ഇളയരാജയുടെ ഏഴ് പാട്ടുകളുമായി ​ഗിഫ്റ്റ്, തമിഴ് ചിത്രം പ്രഖ്യാപിച്ച് അൽഫോൺസ് പുത്രൻ

​ഗോൾഡിന് ശേഷം പുതിയ സിനിമയുമായി അൽഫോൺസ് പുത്രൻ. ​ഗിഫ്റ്റ് എന്ന് പേരിട്ടിരിക്കുന്ന ചിത്രം തമിഴിലാണ് ഒരുക്കുന്നത്. സം​ഗീതത്തിന് പ്രാധാന്യം നൽകിക്കൊണ്ടുള്ളതാണ് ചിത്രം. പ്രമുഖ സം​ഗീതജ്ഞൻ ഇളയരാജയാണ് ചിത്രത്തിന് സം​ഗീതം ഒരുക്കുന്നത്. 

ചിത്രത്തിന്റെ കഥ, തിരക്കഥ, സംഭാഷണം, എഡിറ്റിങ്, കളർ ​ഗ്രേഡിങ് എന്നിവ നിർവഹിക്കുന്നതും അൽഫോൺസ് പുത്രനാണ്. ടൈറ്റിൽ പോസ്റ്റർ പുറത്തുവിട്ടുകൊണ്ടായിരുന്നു പ്രഖ്യാപനം. ഇളയരാജ ഒരുക്കുന്ന ഏഴ് ​ഗാനങ്ങളാണ് ചിത്രത്തിലുള്ളത്. പശ്ചാത്തല സം​ഗീതം ഒരുക്കുന്നതും ഇളയരാജ തന്നെയാണ്. ചിത്രത്തിൽ ഒരു ​ഗാനവും അദ്ദേഹം ആലപിക്കുന്നുണ്ട്. 

നിലവിൽ ​ഗിഫ്റ്റിന്റെ ചിത്രീകരണം പുരോ​ഗമിക്കുക ആണ്. സാൻഡി, കോവെെ സരള, സമ്പത്ത് രാജ്, റേച്ചൽ റബേക്ക, രാഹുൽ, ചാർളി എന്നിവരാണ് ചിത്രത്തിൽ പ്രധാന വേഷത്തിൽ എത്തുന്നത്. റോമിയോ പിക്ചേഴ്‍സിന്റെ ബാനറിൽ രാഹുലാണ് ചിത്രം നിർമിക്കുന്നത്. 

പ്രേമത്തിന് ശേഷം അൽഫോൺസ് പുത്രൻ സംവിധാനം ചെയ്ത ചിത്രമായിരുന്നു ​ഗോൾഡ്. വർഷങ്ങൾക്ക് ശേഷം പുറത്തെത്തിയ ചിത്രം ബോക്സ് ഓഫിസിൽ തകർന്നടിഞ്ഞിരുന്നു. പൃഥ്വിരാജും നയൻതാരയുമാണ് ചിത്രത്തിൽ പ്രധാന വേഷത്തിലെത്തിയത്. 

ഈ വാര്‍ത്ത കൂടി വായിക്കൂ 

ഇൻസ്റ്റ​ഗ്രാമിൽ നിന്നും ഇടവേളയെടുത്ത് അനുശ്രീ; മുറിവുണങ്ങി എത്രയും പെട്ടെന്ന് തിരിച്ചു വരണമെന്ന് ആരാധകർ

 സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ