'എന്തിനാ മാപ്പ് പറഞ്ഞത്, തെറ്റ് നിന്റേതല്ല'; കൂടെ നിന്നവര്‍ക്ക് നന്ദി പറഞ്ഞ് അന്ന രാജന്‍

തനിക്ക് പിന്തുണ നല്‍കിയവര്‍ക്ക് നന്ദി പറഞ്ഞ് അന്ന രാജന്‍. പൊങ്കാല സമയത്തെ വിഡിയോകളുടെ പേരില്‍ അന്ന മാപ്പ് ചോദിച്ചത് വാര്‍ത്തയായിരുന്നു. എന്നാല്‍ താന്‍ തെറ്റൊന്നും ചെയ്തിട്ടില്ലെന്നും അതിനാല്‍ മാപ്പ് ചോദിക്കേണ്ടിയിരുന്നില്ലെന്നും നിരവധി പേര്‍ മെസേജ് അയച്ചുവെന്നാണ് അന്ന പറയുന്നത്.

സോഷ്യല്‍ മീഡിയിയലൂടെയായിരുന്നു അന്നയുടെ പ്രതികരണം. പൊങ്കാലയിടാനെത്തിയ അന്നയുടെ വിഡിയോകളും ചിത്രങ്ങളും സോഷ്യല്‍ മീഡിയയില്‍ വൈറലായിരുന്നു. പിന്നാലെയാണ് താരം മാപ്പ് ചോദിച്ചെത്തിയത്. എന്നാല്‍ അന്നയല്ല മാപ്പ് ചോദിക്കേണ്ടതെന്നും തെറ്റായ രീതിയില്‍ വിഡിയോ ചിത്രീകരിച്ചവരാണെന്നുമായിരുന്നു സോഷ്യല്‍ മീഡിയയുടെ പ്രതികരണം.

''എന്തിനാണ് മാപ്പ് ചോദിച്ചതെന്നും എന്റെ തെറ്റല്ലെന്നും പറഞ്ഞു കൊണ്ട് കൊണ്ട് നിരവധി പ്രതികരണങ്ങളാണ് ലഭിക്കുന്നത്. മനസിലാക്കിയതിനും മെസേജുകള്‍ക്കും കോളുകള്‍ക്കും നന്ദി. എനിക്കിത് വളരെ പ്രധാനപ്പെട്ടതാണ്. മോശം സമയത്താണ് ആരൊക്കെയാണ് കൂടെയുണ്ടാവുകയെന്ന് നമ്മള്‍ തിരിച്ചറിയുക. ചില വലിയ, ബഹുമന്യരായ ആളുകള്‍ എന്നെ പിന്തുണയ്ക്കാനായി സമയം കണ്ടെത്തി. അതിന് ഞാന്‍ ഏറെ കടപ്പെട്ടിരിക്കുന്നു.'' അന്ന പറയുന്നു.

ഈ സമയത്ത് എനിക്ക് ലഭിച്ച സ്‌നേഹവും കരുതലും പ്രോത്സാഹനവും ഞാന്‍ എന്നും ഓര്‍ത്തിരിക്കും. എനിക്കൊപ്പം നിന്നതിന് ഒരിക്കല്‍ കൂടി എല്ലാവരോടും നന്ദി പറയുന്നുവെന്നും അന്ന കുറിപ്പില്‍ പറയുന്നു.

പരിശുദ്ധമായ ഭക്തിയോടെയാണ് താന്‍ പൊങ്കാല സമര്‍പ്പിച്ചതെന്നും തന്റെ വേഷമോ ഭാവങ്ങളോ ഏതെങ്കിലും ഭക്തരെ വിഷമിപ്പിച്ചിട്ടുണ്ടെങ്കില്‍ മാപ്പ് ചോദിക്കുന്നുവെന്നായിരുന്നു അന്ന കഴിഞ്ഞ ദിവസം പറഞ്ഞത്. പിന്നാലെ താരത്തിന് പിന്തുണയുമായി നിരവധി പേര്‍ രംഗത്തെത്തുകയും ചെയ്തു.