'ഇനിയും ഒരുപാട് പാട്ടുകൾ പൂർത്തിയാക്കാനുണ്ട്, എത്ര തവണ ആളുകളോട് ഇങ്ങനെ വിശദീകരിക്കാനാകും'; മൗനം വെടിഞ്ഞ് അർജിത്

പിന്നണി ​ഗാനരം​ഗത്തു നിന്നുള്ള ​ഗായകൻ അർജിത് സിങ്ങിന്റെ വിരമിക്കൽ പ്രഖ്യാപനം ആരാധകരെയും സിനിമാ മേഖലയിലുള്ളവരെയും ഒന്നടങ്കം ഞെട്ടിച്ചിരുന്നു. ഇപ്പോഴിതാ തന്നെ സ്നേഹിക്കുന്ന ആരാധകരോടായി ഒരു സന്ദേശം പങ്കുവെച്ചിരിക്കുകയാണ് അദ്ദേഹം. തന്റെ ഗാനങ്ങൾ കേൾക്കുന്നവരോടായി മാത്രമാണ് താൻ ഇത് പറയുന്നതെന്ന് പറഞ്ഞുകൊണ്ടാണ് അർജിതിന്റെ കുറിപ്പ് ആരംഭിക്കുന്നത്.

എക്സിലൂടെയായിരുന്നു ​ഗായകന്റെ പ്രതികരണം. “ഈ സന്ദേശം എന്റെ ശ്രോതാക്കൾക്ക് വേണ്ടിയുള്ളതാണ്. എന്റെ ശ്രോതാവല്ലെങ്കിൽ ദയവ് ചെയ്ത് വായിക്കരുത് സ്വൈപ്പ് ചെയ്ത് പോകണം. ഇതൊരു അപേക്ഷയാണ്. ഹലോ പ്രിയപ്പെട്ടവരേ! എനിക്ക് നിങ്ങളെല്ലാവരെയും വലിയ ഇഷ്ടമാണെന്ന് പറയാൻ ഞാൻ ആഗ്രഹിക്കുന്നു.

ഈ ക്രൂരമായ ലോകത്ത് നിങ്ങൾ കാണിക്കുന്ന ദയയ്ക്ക് ഒത്തിരി നന്ദി. ഞാൻ പുതിയ ജോലികൾ സ്വീകരിക്കുന്നത് അവസാനിപ്പിച്ചുവെങ്കിലും, ഇനിയും പാടാനുള്ള പാട്ടുകൾ ഒട്ടും കുറവല്ല എന്ന് നിങ്ങൾക്കറിയാമല്ലോ. എനിക്ക് ധാരാളം ഗാനങ്ങൾ പൂർത്തിയാക്കാനുണ്ട്.

പൂർത്തിയാകാത്ത നിരവധി ഗാനങ്ങളുണ്ട്. ഈ വർഷമുടനീളം അതുണ്ടാകും. ചിലപ്പോൾ അടുത്തവർഷവും അത് തുടർന്നേക്കും. സമാധാനത്തോടെ ഇരിക്കുക. ഈ പ്ലാറ്റ്‌ഫോമിൽ നിന്ന് പുറത്തുകടക്കാൻ ശ്രമിക്കുക. നിങ്ങളുടെ ശരീരത്തിൽ നിന്ന് സ്പൈക്ക് പ്രോട്ടീനുകളെ നീക്കം ചെയ്യുക, 5ജി ഉപേക്ഷിക്കുക, വായിക്കുക, സ്നേഹിക്കുക, ധ്യാനിക്കുക. ജയ് ദേവി!"- അർജിത് കുറിച്ചു.

ഇക്കഴിഞ്ഞ ജനുവരിയിലാണ് പിന്നണി ​ഗാനരം​ഗത്ത് നിന്ന് താൻ വിരമിക്കുകയാണെന്ന് അർജിത് പ്രഖ്യാപിച്ചത്. പ്രത്യേകിച്ച് കാരണങ്ങളൊന്നും അദ്ദേഹം വ്യക്തമാക്കിയിരുന്നില്ല.