കേസ് കത്തി നില്‍ക്കെ 'ആനക്കൊമ്പ്' സമ്മാനിക്കാന്‍ വന്നവര്‍; മോഹന്‍ലാലിന്‍റെ പ്രതികരണത്തെക്കുറിച്ച് കലാ സംവിധായകന്‍

മോഹന്‍ലാലിന്റെ ജീവിതത്തിലെ വലിയ വിവാദങ്ങളിലൊന്നായിരുന്ന ആനക്കൊമ്പ് കേസ്. വര്‍ഷങ്ങളോളം ഇതിന്റെ പേരില്‍ മോഹന്‍ലാലിന് നിയമനടപടി നേരിടേണ്ടി വന്നിരുന്നു. ഈ കേസുമായി ബന്ധപ്പെട്ടൊരു കഥ പങ്കുവെക്കുകയാണ് കലാസംവിധായകന്‍ ജോസഫ് നെല്ലിക്കല്‍. മോഹന്‍ലാല്‍ നായകനായ മാടമ്പിയുടെ ചിത്രീകരണത്തിനിടെ ഉണ്ടായ സംഭവമാണ് അദ്ദേഹം പങ്കുവെക്കുന്നത്.

സഫാരി ടിവിയിലെ ചരിത്രം എന്നിലൂടെ എന്ന പരിപാടിയില്‍ സംസാരിക്കുകയായിരുന്നു ജോസഫ് നെല്ലിക്കല്‍. ആനക്കൊമ്പ് കേസ് കത്തി നില്‍ക്കവെ മോഹന്‍ലാലിനെ കാണാന്‍ എത്തിയ ആരാധകരേയും അവര്‍ നല്‍കിയ സമ്മാനത്തെക്കുറിച്ചുമാണ് ജോസഫ് നെല്ലിക്കല്‍ സംസാരിക്കുന്നത്.

''മാടമ്പിയെക്കുറിച്ച് ഏറ്റവും കൂടുതല്‍ ഓര്‍ക്കുന്ന കാര്യമുണ്ട്. ഈ സിനിമ നടക്കുന്ന സമയത്താണ് ലാലേട്ടന്റെ ആനക്കൊമ്പുമായി ബന്ധപ്പെട്ട വിഷയം ചാനലുകളിലും പേപ്പറുകളിലും വരുന്നത്. സാധാരണ ലാലേട്ടന്റെ ഷൂട്ട് നടക്കുന്ന ലൊക്കേഷനുകളില്‍ അദ്ദേഹത്തിന്റെ ആരാധകര്‍ വരാറുണ്ട്. അവര്‍ ഒപ്പം ഫോട്ടോയെടുക്കും. എന്തെങ്കിലും ഉദ്ഘാടനം ചെയ്യാനോ പുസ്തകങ്ങള്‍ റിലീസ് ചെയ്യാനോ കാണും. ഈ ലൊക്കേഷനിലേക്കും ആരാധകര്‍ വരുമെന്നും അവര്‍ എന്തോ ഉപഹാരം കൊടുക്കുന്നുണ്ടെന്നും അതിനായി തിയ്യതി തീരുമാനിക്കാന്‍ പറഞ്ഞിരുന്നു'' ജോസഫ് നെല്ലിക്കല്‍ പറയുന്നു.

''സാധാരണഗതിയില്‍ ഇങ്ങനെയുള്ള കാര്യങ്ങള്‍ നടത്തുക ഏതെങ്കിലും വീടുകളിലോ സുരക്ഷിതമായ സ്ഥലത്തോ ആയിരിക്കും. പക്ഷെ ഞങ്ങള്‍ റോഡ് സൈഡില്‍ ഷൂട്ട് ചെയ്യുന്ന സമയത്താണ് ഈ ടീമിന് ഡേറ്റ് കിട്ടിയതും അവര്‍ വരുന്നതും. അന്നത്തെ ദിവസം നേരത്തെ പറഞ്ഞ വിഷയം നടക്കുകയാണ്. ചാനലുകളില്‍ ചര്‍ച്ച നടക്കുകയാണ്, ലാലേട്ടന്റെ വീട്ടില്‍ നിന്നും ആനക്കൊമ്പ് കണ്ടെത്തിയെന്നും പറഞ്ഞ്''.

''രാവിലെ ഈ ഗ്രൂപ്പ് വന്നു. അവരുടെ കയ്യില്‍ വലിയൊരു പൊതിയുണ്ട്. പേപ്പറൊക്കെ വച്ച് പൊതിഞ്ഞിരിക്കുകയാണ്. റോഡ് സൈഡ് ആയതിനാല്‍ കാണാന്‍ ചുറ്റും ഒരുപാട് പേരുണ്ട്. അവര്‍ വന്നു, കൂടെ നിന്നു ഫോട്ടോയെടുത്തു. ശേഷം അവരുടെ കയ്യിലുണ്ടായിരുന്ന സമ്മാനം ലാലേട്ടന് കൈമാറി. കൈമാറുന്നതിന് മുമ്പ് അത് തുറന്നു. പേപ്പര്‍ മാറ്റുമ്പോഴാണ് എല്ലാവരും കാണുന്നത്. അത് അകത്തിരിക്കുന്നത് ആനക്കൊമ്പിന്റെ രൂപമുള്ള ഉപഹാരമായിരുന്നു'' അദ്ദേഹം പറയുന്നു.

''അത് കണ്ട് മൊത്തം ആള്‍ക്കാരും ഞെട്ടി. കാരണം അന്നത്തെ ദിവസം ചര്‍ച്ച നടക്കുന്നത് ആനക്കൊമ്പിന്റെ വിഷയമാണ്. അപ്പോഴാണ് ആരാധകര്‍ രണ്ട് ആനക്കൊമ്പിന്റെ ഉണ്ടാക്കി കൊണ്ടുകൊടുക്കുന്നത്. ലാലേട്ടന്‍ എല്ലാവരേയും നോക്കുന്നുണ്ട്. ഞാനിപ്പോള്‍ പറയുമ്പോള്‍ ഓക്കെയാണ്. പക്ഷെ അന്ന് ലാലേട്ടന്‍ അനുഭവിച്ചിരുന്ന പ്രശ്‌നമുണ്ട്. ലാലേട്ടന്‍ കൂളായി തന്നെ എടുത്തു. ചിരിച്ചു കൊണ്ട് തന്നെ സ്വീകരിച്ചു. പക്ഷെ ഞങ്ങള്‍ക്കിടയില്‍ അത് വലിയൊരു ചര്‍ച്ചയായി.