​'ഗീത പ്രഭാകറിനെപ്പോലെ ജോർജുകുട്ടിക്കും മക്കൾക്കുമൊക്കെ പ്രായം കൂടിയിട്ടുണ്ട്; ദൃശ്യം 3യെ ഞാൻ കാണുന്നത് അങ്ങനെയാണ്'

ഈ വർഷം മലയാളികൾ ഏറ്റവും ആകാംക്ഷയോടെ കാത്തിരിക്കുന്ന ചിത്രങ്ങളിലൊന്നാണ് ദൃശ്യം 3. ജോർജുകുട്ടിക്കും കുടുംബത്തിനും എന്ത് സംഭവിക്കുമെന്ന് അറിയാനുള്ള കാത്തിരിപ്പിലാണ് പലരും. ചിത്രത്തിന്റെ കഥയെക്കുറിച്ചും കഥാപാത്രങ്ങളെക്കുറിച്ചുമൊക്കെ പ്രേക്ഷകർ ചർച്ച തുടങ്ങി കഴിഞ്ഞു. ​

ഗീത പ്രഭാകർ എന്ന കഥാപാത്രമായി ചിത്രത്തിൽ ആശ ശരത്തും എത്തിയിരുന്നു. എല്ലാവരെയും പോലെ തന്നെ താനും ദൃശ്യം 3 റിലീസിനായി കാത്തിരിക്കുകയാണെന്ന് പറയുകയാണ് ആശ ശരത്. ജോർജുകുട്ടിക്കും കുടുംബത്തിനും എന്ത് സംഭവിക്കുമെന്നറിയാൻ കാത്തിരിക്കുന്നവരുടെ കൂട്ടത്തിൽ താനുമുണ്ടെന്നും മാതൃഭൂമിയ്ക്ക് നൽകിയ അഭിമുഖത്തിൽ ആശ ശരത് പറഞ്ഞു.

"മലയാളികളെല്ലാം ആകാംക്ഷയോടെ കാത്തിരിക്കുന്ന ദൃശ്യം 3 ആണ് ഇനി വരാനുള്ളത്. എല്ലാവരെയും പോലെ ഞാനും ആകാംക്ഷയോടെ തന്നെയാണ് ആ സിനിമയെ കാത്തിരിക്കുന്നത്. ദൃശ്യം 1 പോലെയല്ല ദൃശ്യം 2 എന്നും അതുപോലെയായിരിക്കില്ല ദൃശ്യം 3 എന്നുമാണ് സംവിധായകൻ ജീത്തു ജോസഫ് പറഞ്ഞത്.

ജോർജുകുട്ടിക്കും കുടുംബത്തിനും എന്ത് സംഭവിക്കുമെന്നറിയാൻ കാത്തിരിക്കുന്നവരുടെ കൂട്ടത്തിൽ ഞാനുമുണ്ട്. ​ഗീത പ്രഭാകർ എന്ന എന്റെ കഥാപാത്രത്തിന് ഇപ്പോൾ അഞ്ചാറ് വർഷത്തെ വ്യത്യാസമുണ്ടാകും. കാരണം അത്രയും വർഷങ്ങൾക്ക് ശേഷമാണ് ദൃശ്യം 3 വരുന്നത്. എന്നെപ്പോലെ ജോർജുകുട്ടിക്കും റാണിക്കും മക്കൾക്കുമൊക്കെ പ്രായം കൂടിയിട്ടുണ്ട്.

മൂന്നു സിനിമകളുടെ നീണ്ട കാലത്തിനിടയിൽ നമുക്കെല്ലാം വലിയ മാറ്റങ്ങൾ വരുമല്ലോ, അതുകൊണ്ടുതന്നെ ജീവിതം കടന്നു പോകുന്നതു പോലെയാണ് ദൃശ്യം എന്ന സിനിമയുടെ അഭിനയകാലത്തെ ഞാൻ അനുഭവിക്കുന്നത്". - ആശ ശരത് പറഞ്ഞു.

ആശകൾ ആയിരം ആണ് നടിയുടേതായി ഒടുവിൽ തിയറ്ററുകളിലെത്തിയ ചിത്രം. ജയറാമും കാളിദാസ് ജയറാമും ചിത്രത്തിൽ പ്രധാന വേഷങ്ങളിലെത്തിയിരുന്നു. അതേസമയം ജീത്തു ജോസഫ്- മോഹൻലാൽ കൂട്ടുകെട്ടിലെത്തുന്ന ദൃശ്യം 3 ഏപ്രിൽ രണ്ടിനാണ് തിയറ്ററുകളിലെത്തുന്നത്.