ആരൊക്കെ വന്നാലും ബാഹുബലിയുടെ തട്ട് താഴ്ന്ന് തന്നെയിരിക്കും! റീ റിലീസ് കളക്ഷനിൽ പുതുചരിത്രം കുറിച്ച് രാജമൗലി ചിത്രം

ബാഹുബലി റീ റിലീസിന് മികച്ച സ്വീകരണമാണ് തിയറ്ററുകളിൽ നിന്ന് ലഭിച്ചു കൊണ്ടിരിക്കുന്നത്. ബാഹുബലിയുടെ രണ്ട് ഭാ​ഗങ്ങളും കൂടി ചേർത്ത് ബാഹുബലി ദ് എപ്പിക് എന്ന പേരിലാണ് ചിത്രം റീ റിലീസിനെത്തിയത്. പത്ത് വർഷത്തിന് ശേഷം തിയറ്ററുകളിലെത്തിയപ്പോഴും ചിത്രം കളക്ഷനിലും വൻ കുതിപ്പാണ് നടത്തുന്നത്.

റീ റിലീസ് ചരിത്രത്തിലെ തന്നെ ഏറ്റവും വലിയ കുതിപ്പിലേക്കാണ് ബാഹുബലി ദ് എപ്പിക് കുതിക്കുന്നത്. പ്രീ സെയിലിലൂടെ മാത്രം എട്ട് കോടിയിലേറെ നേടിയ ചിത്രം ലോകമെമ്പാടുമായി ആദ്യ ദിനം 20 കോടിയാണ് കളക്ട് ചെയ്തിരിക്കുന്നത്. റീ റിലീസ് ചിത്രങ്ങളുടെ കാര്യത്തിൽ ഇതൊരു നാഴികകല്ലാണ്.

ഇന്ത്യയിലെ റീ റിലീസ് സിനിമകളിൽ ഏറ്റവുമുയർന്ന കളക്ഷൻ നേടിയ സിനിമയായി ബാഹുബലി മാറുമെന്നാണ് കണക്കുകൂട്ടൽ. ഇൻഡസ്ട്രി ട്രാക്കർമാരായ സാക്നിൽക്കിന്റെ റിപ്പോർട്ട് അനുസരിച്ച് ബാഹുബലി: ദ് എപ്പിക് ഇന്ത്യയിൽ ആദ്യ ദിവസം 10 കോടി രൂപയിലധികം കളക്ഷൻ നേടിയെന്നാണ് വിവരം.

അതേസമയം അഞ്ച് മണിക്കൂറിൽ കൂടുതൽ ദൈർഘ്യമുള്ള ബാഹുബലി സീരിസിനെ മൂന്ന് മണിക്കൂർ ആയി ചുരുക്കിയാണ് അണിയറപ്രവർത്തകർ റീ റിലീസ് ചെയ്തിരിക്കുന്നത്. ബാഹുബലിക്ക് മൂന്നാം ഭാ​ഗമുണ്ടാകുമോയെന്ന ചോദ്യത്തിനും റീ റിലീസ് വേർഷൻ ഉത്തരം നൽകുന്നുണ്ട്. ബാഹുബലിയുടെ തുടർച്ചയായിട്ടല്ലാതെ അതേ ലോകത്ത് നടക്കുന്ന മറ്റൊരു കഥ അനിമേഷൻ സിനിമയായി പുറത്തിറങ്ങുമെന്നാണ് അണിയറപ്രവർത്തകർ നൽകുന്ന വിവരം.

ബാഹുബലി ദ് എറ്റേണൽ വാർ എന്ന് പേരിട്ടിരിക്കുന്ന ചിത്രത്തിന്റെ ​ഗ്ലിംപ്സ് ടെയ്‌ൽ എൻഡിൽ‌ കാണിക്കുന്നുമുണ്ട്. പ്രഭാസ്, റാണ ദ​ഗുബാട്ടി, അനുഷ്ക ഷെട്ടി, സത്യരാജ്, തമന്ന എന്നിവരാണ് ചിത്രത്തിൽ പ്രധാന വേഷങ്ങളിലെത്തിയത്.