'ജയറാമേട്ടൻ്റെ കാലം കഴിഞ്ഞു എന്ന് പറഞ്ഞവർക്കുള്ള മറുപടി'; നടന് സ്നേഹ ചുംബനം നൽകി ഋഷഭ് ഷെട്ടി

കാന്താര ചാപ്റ്റർ 1 ലെ ജയറാമിന്റെ കഥാപാത്രം അക്ഷരാർഥത്തിൽ പ്രേക്ഷകരെ ഞെട്ടിച്ചിരുന്നു. ബാം​ഗ്രയിലെ രാജാവായ രാജശേഖരൻ എന്ന കഥാപാത്രമായാണ് ചിത്രത്തിൽ ജയറാമെത്തിയത്. ഇതുവരെ ജയറാം ചെയ്തിട്ടുള്ളതിൽ വച്ച് വ്യത്യസ്തമാർന്ന കഥാപാത്രം കൂടിയായിരുന്നു രാജശേഖരൻ. ഇപ്പോഴിതാ ജയറാം പങ്കുവച്ചിരിക്കുന്ന ഒരു ചിത്രമാണ് സോഷ്യൽ മീഡിയയുടെ മനം കവരുന്നത്.

കാന്താരയുടെ സംവിധായകനും നായകനുമായ ഋഷഭ് ഷെട്ടിക്കൊപ്പമുള്ള ചിത്രമാണ് ജയറാം പങ്കുവച്ചിരിക്കുന്നത്. ഋഷഭ് ഷെട്ടി തനിക്ക് സ്നേഹ ചുംബനം നൽകുന്ന ചിത്രമാണ് ജയറാം പോസ്റ്റ് ചെയ്തത്. ന്യൂഡൽഹിയിൽ വച്ചാണ് ജയറാമും ഋഷഭും തമ്മിൽ കണ്ടുമുട്ടിയത്. നിരവധി ആരാധകരാണ് ജയറാമിന്റെ പോസ്റ്റിന് കമന്റുമായെത്തിയിരിക്കുന്നത്.

'നിങ്ങളെയോർത്ത് അഭിമാനം ജയറാമേട്ടാ', 'ഒടുവിൽ ഒരു യഥാർഥ പാൻ‌ ഇന്ത്യൻ പടം ജയറാമിന് ലഭിച്ചു', 'ജയറാമേട്ടൻ്റെ കാലം കഴിഞ്ഞു എന്ന് പറഞ്ഞവർക്കുള്ള മറുപടി'- എന്നൊക്കെയാണ് പോസ്റ്റിന് താഴെ നിറയുന്ന കമന്റുകൾ. ഒക്ടോബർ രണ്ടിന് തിയറ്ററുകളിലെത്തിയ ചിത്രം ലോകമെമ്പാടുമായി 450 കോടിയോളം കളക്ഷൻ നേടി.

ജയറാമിനെ കൂടാതെ ​ഗുൽഷൻ ദേവയ്യ, രുക്മിണി ‌വസന്ത് തുടങ്ങിയവരും ചിത്രത്തിൽ പ്രധാന വേഷങ്ങളിലെത്തി. കാന്താരയുടെ മേക്കിങിനും വിഎഫ്എക്സിനുമെല്ലാം മികച്ച പ്രതികരണമാണ് പ്രേക്ഷകരിൽ നിന്ന് ലഭിച്ചത്. 125 കോടി ബജറ്റിലൊരുക്കിയ ചിത്രം ഹോംബാലെ ഫിലിംസ് ആണ് നിർമിച്ചത്.