'പുതുമുഖങ്ങളെ അത്രത്തോളം പിന്തുണയ്ക്കുന്ന ഒരു സൂപ്പർ സ്റ്റാർ ഉണ്ടെങ്കിൽ, അത് രജനി സാറാണ്'

കാർത്തി നായകനായെത്തുന്ന 'സർദാർ 2' വാണ് നടി മാളവിക മോഹനന്റെ പുതിയ ചിത്രം. പി എസ് മിത്രനാണ് 'സർദാർ 2' സംവിധാനം ചെയ്തിരിക്കുന്നത്. കഴിഞ്ഞ ദിവസം എക്സിൽ ചോദ്യോത്തര സെഷനിൽ ആരാധകരുടെ ചോദ്യങ്ങൾക്ക് മാളവിക മറുപടി നൽകിയിരുന്നു.

'രജനികാന്തിനൊപ്പം അഭിനയിച്ചതിന്റെ അനുഭവം പങ്കുവയ്ക്കാമോ ?' എന്നായിരുന്നു മാളവികയോടുള്ള ചോദ്യം. ഏതൊരു പുതുമുഖവും ആ​ഗ്രഹിക്കുന്ന ഒരു അവസരമാണ് അതെന്ന് മാളവിക പറഞ്ഞു. 2019 ൽ പുറത്തിറങ്ങിയ 'പേട്ട'യിലാണ് രജനികാന്തിനൊപ്പം മാളവിക അഭിനയിച്ചത്.

"പേട്ട'യിൽ തലൈവർക്കൊപ്പം അഭിനയിക്കാൻ കഴിഞ്ഞത് ഏതൊരു പുതുമുഖവും ആ​ഗ്രഹിക്കുന്ന ഏറ്റവും മികച്ച അനുഭവമാണ്. പുതുമുഖങ്ങളെ പിന്തുണയ്ക്കുന്ന, അവരെ പ്രോത്സാഹിപ്പിക്കുന്ന, പരസ്യമായി പ്രശംസിക്കുന്ന ഒരു സൂപ്പർ സ്റ്റാർ ഉണ്ടെങ്കിൽ അത് രജനി സാറാണ്.

എന്റെ കരിയറിന്റെ തുടക്കത്തിൽ തന്നെ അദ്ദേഹം എനിക്ക് വളരെയധികം ആത്മവിശ്വാസവും പിന്തുണയും നൽകി, അത് ഞാൻ വളരെയധികം വിലമതിക്കുകയും എന്റെ ഹൃദയത്തോട് ചേർത്തുനിർത്തുകയും ചെയ്യുന്നു".- മാളവിക കുറിച്ചു.

'പേട്ട'യിൽ നവാസുദ്ദീൻ സിദ്ദിഖി അവതരിപ്പിച്ച സിങ്കാരത്തിന്റെ സഹോദരി പൂങ്കൊടിയായാണ് മാളവിക അഭിനയിച്ചത്. അതേസമയം 'സർദാർ 2' വിൽ തനിക്ക് നിരവധി ആക്ഷൻ രം​ഗങ്ങളുണ്ടെന്ന് മാളവിക പറഞ്ഞിരുന്നു. ആക്ഷൻ ചെയ്യാൻ തനിക്ക് ഇഷ്ടമാണെന്നും മാളവിക വെളിപ്പെടുത്തിയിരുന്നു.