അഖിൽ അക്കിനേനിക്കൊപ്പം മമ്മൂട്ടിയും; ‘യാത്ര’യ്ക്കു ശേഷം ഏജന്റ്, താരം യൂറോപ്പിലേക്ക് 

തെലുങ്ക് സൂപ്പർതാരം നാഗാർജുനയുടെയും നടി അമലയുടെയും മകനും യുവതാരവുമായ അഖിൽ അക്കിനേനി നായകനാകുന്ന ബിഗ് ബജറ്റ് ചിത്രത്തിൽ മമ്മൂട്ടിയും. 'ഏജന്റ്' എന്നാണ് ചിത്രത്തിന്റെ പേര്. ചിത്രത്തിൽ മമ്മൂട്ടി പട്ടാള ഉദ്യോഗസ്ഥന്റെ വേഷത്തിലാണ് എത്തുക. സുരേന്ദർ റെഡ്ഢിയാണ് സിനിമ സംവിധാനം ചെയ്യുന്നത്. 

ഹോളിവുഡ് ത്രില്ലർ ബോൺ സീരിസിൽ നിന്നും പ്രചോദനമുൾക്കൊണ്ട് ഒരുക്കുന്ന ചിത്രമാണ് ഏജന്റ്. സിനിമയുടെ ആദ്യഘട്ടചിത്രീകരണം ഹൈദരാബാദിൽ തുടങ്ങി. ഷൂട്ടിങ്ങിനായി മറ്റന്നാൾ മമ്മൂട്ടി യൂറോപ്പിലേക്ക് പോകും. നവംബർ രണ്ട് വരെയാണ് യൂറോപ്പിൽ ചിത്രീകരണം. കശ്മീർ, ഡൽഹി, ഹൈദരാബാദ് എന്നിവടങ്ങളാണ് ഇന്ത്യയിലെ ചിത്രീകരണം. 

വൈഎസ്ആറിന്റെ ജീവിതം പറഞ്ഞ ‘യാത്ര’യ്ക്കു ശേഷം മമ്മൂട്ടി അഭിനയിക്കുന്ന തെലുങ്ക് ചിത്രമാണ് ഏജന്റ്.