'പല നിർമാതാക്കളും നിരുത്സാഹപ്പെടുത്തി; എന്നിട്ടും മൃ​ഗയ പോലുള്ള സിനിമകൾ ഞാൻ ചെയ്തിട്ടുണ്ട്'

വ്യത്യസ്തമാർന്ന കഥാപാത്രങ്ങൾ ചെയ്യണം എന്നത് തന്റെ ആഗ്രഹമായിരുന്നുവെന്ന് നടൻ മമ്മൂട്ടി. എന്ത് കൊടുത്താലും നല്ലതാണെങ്കിൽ പ്രേക്ഷകർ സ്വീകരിക്കുമെന്ന ധൈര്യം തനിക്കുണ്ടെന്നും അദ്ദേഹം പറഞ്ഞു. തന്റെ പുതിയ ചിത്രമായ പേട്രിയറ്റിന്റെ പ്രൊമോഷന്റെ ഭാ​ഗമായി ആന്റോ ജോസഫ് ഫിലിം കമ്പനിയ്ക്ക് നൽകിയ അഭിമുഖത്തിലായിരുന്നു മമ്മൂട്ടി ഇക്കാര്യം പറഞ്ഞത്.

'ധൈര്യപൂർവം മമ്മൂക്ക ഇന്ന് ഒരുപാട് കഥാപാത്രങ്ങൾ ചെയ്യുന്നുണ്ട്. എങ്ങനെയാണത്' എന്നായിരുന്നു നടി രേവതിയുടെ ചോദ്യം. "അതിന്റെ കാരണമെന്താണെന്ന് ചോദിച്ചാൽ, എനിക്ക് പണ്ട് മുതലേയുള്ള ആ​ഗ്രഹങ്ങളാണ് ഇതൊക്കെ. അന്ന് ഞാൻ പലതും ചെയ്തിട്ടുണ്ട്. അധികം എന്നെ ചെയ്യാൻ സമ്മതിച്ചിട്ടില്ല.

കാരണം പടം ഓടുകയും കൂടി വേണമല്ലോ. അപ്പോൾ പല നിർമാതാക്കളും നിരുത്സാഹപ്പെടുത്തി. എന്നിട്ടും മൃ​ഗയ പോലുള്ള സിനിമകൾ ചെയ്തിട്ടുണ്ട്. കുറെയേറെ അങ്ങനെ വന്നതാണ്. ഇന്നത്തെ കാലത്ത് പ്രേക്ഷകർ കുറച്ചു കൂടി വിദ്യാഭ്യാസമുള്ളവരും അല്ലെങ്കിൽ ‍ഡെവല്പ്ഡോ സിനിമയെക്കുറിച്ച് കുറച്ചു കൂടി ധാരണയുള്ളവരോ ഒക്കെയാണ്.

എന്ത് കൊടുത്താലും നല്ലതാണെങ്കിൽ അവർ സ്വീകരിക്കും. ആ ഒരു ധൈര്യമുണ്ട് എനിക്ക്. പിന്നെ പ്രൊഡക്ഷൻ മിക്കവാറും ഞാൻ തന്നെയായിരിക്കും". - മമ്മൂട്ടി പറഞ്ഞു. അതേസമയം മമ്മൂട്ടിയ്ക്കൊപ്പം മോഹൻലാൽ, രേവതി, നയൻതാര, കുഞ്ചാക്കോ ബോബൻ, ഫഹദ് ഫാസിൽ, ദർശന രാജേന്ദ്രൻ, രാജീവ് മേനോൻ എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്.