'എന്നെ ഇതുവരെ ആരും മാറ്റി നിർത്തിയിട്ടില്ല, മാറി നിന്നത് ഞാൻ ആണ്'; മിൻമിനി

'ചിന്ന ചിന്ന ആസൈ', 'പാതിരാവായി നേരം...' തുടങ്ങി ഒട്ടേറെ ഹിറ്റു ​ഗാനങ്ങളിലൂടെ സിനിമാ പ്രേക്ഷകരുടെയും സം​ഗീതാസ്വാദകരുടെയും മനം കവർന്ന ​ഗായികയാണ് മിൻമിനി. 'ചിന്ന ചിന്ന ആസൈ..' എന്ന പാട്ടിലൂടെയാണ് മിൻമിനി പ്രശസ്തയാകുന്നത്. എബ്രിഡ് ഷൈൻ സംവിധാനം ചെയ്ത 'സ്പാ' എന്ന ചിത്രത്തിലൂടെ സിനിമയിലേക്ക് വീണ്ടും തിരിച്ചുവരവ് നടത്തിയിരിക്കുകയാണ് മിൻമിനി.

സ്പായിലെ 'ഹൃദയവതി...' എന്ന ​ഗാനത്തിലൂടെയാണ് മിൻമിനി വീണ്ടും മലയാളികളുടെ മനം കവരുന്നത്. ഇപ്പോഴിതാ തന്നെ പാട്ടിൽ നിന്ന് ആരും മാറ്റി നിർത്തിയിട്ടില്ല എന്ന് പറയുകയാണ് ​ഗായിക. കേരള കൗമുദിയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു മിൻമിനി.

"എന്നെ ഇതുവരെ ആരും മാറ്റി നിർത്തിയിട്ടില്ല. ഞാൻ ആണ് മാറി നിന്നത്. പാടാൻ അവസരമില്ലാതെ മാറി നിന്ന ​ഗായികയായിരുന്നില്ല‌. പാടാൻ കഴിയാതിരുന്ന സമയത്തും അവസരങ്ങൾ വന്നു. കഴിവുള്ളവരെ എന്നും പ്രോത്സാഹിപ്പിക്കുന്ന ഒരു സമൂഹം എല്ലായിടത്തുമുണ്ട്. വളരെയധികം സന്തോഷവും സംതൃപ്തിയുമുണ്ട്.

അന്ന് എന്നെ കുഞ്ഞു മിനിയായി കണ്ട് സ്വീകരിച്ച ആസ്വാദകർ ഇപ്പോഴും അതേ സ്നേഹത്തോടും പ്രോത്സാഹനത്തോടും സ്നേഹിക്കുകയും എന്റെ പാട്ട് കേൾക്കാൻ ആ​ഗ്രഹിക്കുകയും ചെയ്യുന്നു. ഇതിലും വലിയ ഒരു അവാർഡ് ​ഗായിക എന്ന നിലയിൽ ലഭിക്കാനില്ല. ശ്രോതാക്കളുടെ മനസിൽ ​ഗായകനോ ​ഗായികയോ ഉണ്ടാവുക എന്നതാണ് ഏറ്റവും വലിയ അവാർഡ് എന്ന് വിശ്വസിക്കുന്നു".- മിൻമിനി പറഞ്ഞു.