മലയാള സിനിമയില്‍ നായികമാരെ സംബന്ധിച്ച് നിലനില്‍ക്കുകയെന്നത് പ്രയാസമേറിയ കാര്യമാണെന്ന് നടി നിഖില വിമല്‍. പ്രതിഫലം കൂട്ടി ചോദിച്ചാല്‍ സിനിമ ലഭിക്കാന്‍ ബുദ്ധിമുട്ടാണെന്നാണ് നിഖില പറയുന്നത്. ഇതുകാരണം ഇപ്പോള്‍ കാക്കനാട് പോയി വിളിച്ച് കൂവിയാല്‍ ഒരു ഫ്‌ളാറ്റില്‍ നിന്നും കുറഞ്ഞത് മൂന്ന് പുതുമുഖ നായികമാരെങ്കിലും ഇറങ്ങിവരുമെന്നും നിഖില വിമല്‍ പറയുന്നു. വിറ്റ് ടോക്‌സിന് നല്‍കിയ അഭിമുഖത്തിലാണ് താരത്തിന്റെ പ്രതികരണം.
''നിങ്ങള്‍ക്കുള്ളതാണ് സിനിമയെങ്കില്‍ നിങ്ങള്‍ കൊച്ചിയിലേക്ക് വരണമെന്നില്ല. പുറത്തു നിന്ന് വന്ന് വര്‍ക്ക് ചെയ്യുന്ന എത്രയോ പേരുണ്ട്. നമ്മള്‍ക്ക് വര്‍ക്ക് കൂടുകയും ഇവിടെ നില്‍ക്കേണ്ടത് നമ്മുടെ ആവശ്യമാണെന്ന് തോന്നുമ്പോഴും കൊച്ചിയിലേക്ക് ഷിഫ്റ്റ് ചെയ്താല്‍ മതിയാകും. പക്ഷെ നമ്മള്‍ ആദ്യത്തെ സിനിമ കഴിയുമ്പോഴേക്കും കൊച്ചിയിലേക്ക് വരും. സിനിമയില്‍ നിന്നും പറയുന്നത് അങ്ങനെയാണ്. ഇവിടെ നിന്ന് ശ്രമിച്ചാലേ കിട്ടുകയുള്ളൂവെന്ന് പറയും. ശ്രമിക്കാന്‍ ടിക്കറ്റെടുത്ത് വന്നാല്‍ മതി. അല്ലാതെ ഇവിടെ വാടകയും കറന്റു ബില്ലുമൊക്കെ കൊടുത്ത് നില്‍ക്കണമെന്നില്ല'' നിഖില വിമല്‍ പറയുന്നു.
''എന്നോട് ആര് ചോദിച്ചാലും ഞാന്‍ പറയുക, ഇപ്പോള്‍ ഷിഫ്റ്റ് ചെയ്യണ്ട, രണ്ടോ മൂന്നോ സിനിമകള്‍ വരട്ടെ. ഇവിടെ സെറ്റില്‍ ആകാം എന്ന് തോന്നുമ്പോള്‍ മതിയെന്ന് പറയും. അല്ലാതെ കുടുംബമായിട്ട് മാറുകയാണെങ്കില്‍ ഓക്കെ. അല്ലാത്തപക്ഷം ഭയങ്കര സ്ട്രഗ്‌ളിങ് ആണ്. ഞാന്‍ എപ്പോഴും പറയുന്ന ഒന്നുണ്ട്. കാക്കനാട് പോയിട്ട് ഒന്ന് വിളിച്ച് കൂവിയാല്‍ എല്ലാ ഫ്‌ളാറ്റില്‍ മിന്നും മൂന്ന് പുതുമുഖ നായികമാരെങ്കിലും ഇറങ്ങി വരും എന്ന്.''
''ഈയ്യടുത്ത് എന്നോട് വളരെ പ്രശസ്തനായൊരാള്‍ ചോദിച്ചിരുന്നു എന്തുകൊണ്ട് മലയാള സിനിമയില്‍ നടിമാര്‍ നിലനില്‍ക്കുന്നില്ല. പണ്ടൊക്കെ ഉള്ള ആളുകള്‍ ഒരുപാട് കാലം സിനിമ ചെയ്തിരുന്നുവല്ലോ എന്ന്. ഞാന്‍ പറഞ്ഞ മറുപടി, നിങ്ങള്‍ ഒരു പുതുമുഖ നടിയെ വിളിച്ചു കൊണ്ടു വരും. രണ്ടാമത്തെ സിനിമ അവർ എങ്ങനെയൊക്കെയോ കഷ്ടപ്പെട്ട് ചെയ്യും. മൂന്നാമത്തെ സിനിമയില്‍ അവര്‍ കാശ് കൂടുതല്‍ ചോദിക്കും. അത് നിങ്ങള്‍ക്ക് ഇഷ്ടമാകില്ല. അപ്പോള്‍ നിങ്ങള്‍ പുതിയ പുതുമുഖ നായികയെ കൊണ്ടു വരും. അതോടെ മറ്റവര്‍ സ്ട്രഗ്‌ളിങ് ആകും. സത്യമായിട്ടും ഇപ്പോള്‍ കാക്കനാടുള്ള ഫ്‌ളാറ്റുകളില്‍ പോയി വിളിച്ച് കൂവിയാല്‍ ഒരു ഫ്‌ളാറ്റില്‍ നിന്നും മൂന്ന് പുതുമുഖ നായികമാരെങ്കിലും ഇറങ്ങിവരും. ഇത് ഭയങ്കര സ്ട്രഗിള്‍ ആണ്. ഇപ്പോള്‍ ഇന്‍ഫ്‌ളുവന്‍സിങ് മാര്‍ക്കറ്റ് ഉള്ളതു കൊണ്ട് അവര്‍ സര്‍വൈവ് ചെയ്തു പോകുന്നു.'' എന്നാണ് താരം പറയുന്നത്.
ഞാന്‍ ഈയ്യടുത്താണ് കൊച്ചിയിലേക്ക് ഷിഫ്റ്റ് ചെയ്തത്. അഞ്ചാറു കൊല്ലമേ ആകുന്നുള്ളൂ. ഇവിടെ പണിയിലെങ്കില്‍ ഞാന്‍ ഇപ്പോഴും വീട്ടില്‍ പോകും. നാടുമായി കുറച്ചധികം അറ്റാച്ച്‌മെന്റുണ്ട്. നേരത്തെ വീട്ടില്‍ പോയി വരികയായിരുന്നുവെന്നും നിഖില പറയുന്നു. പെണ്ണ് കേസ് ആണ് നിഖിലയുടേതായി പുറത്തിറങ്ങാനുള്ള പുതിയ സിനിമ. വിവാഹത്തട്ടിപ്പുകാരിയായിട്ടാണ് ചിത്രത്തില്‍ നിഖില അഭിനയിക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
