പാ രഞ്ജിത്ത് സംവിധാനം ചെയ്ത് നീലം പ്രൊഡക്ഷന്‍സും ലേണ്‍ ആന്‍ഡ് ടീച്ച് പ്രൊഡക്ഷന്‍സും ചേര്‍ന്ന് നിര്‍മിക്കുന്ന വേട്ടുവം 2017 ലെ പൊങ്കല്‍ ഉത്സവത്തോടനുബന്ധിച്ച് തിയേറ്ററുകളില്‍ റിലീസ് ചെയ്യും. ധര്‍മന്‍, സേയന്‍ എന്നീ ചിത്രങ്ങളും പൊങ്കല്‍ അവധിയ്ക്ക് തിയേറ്ററുകളെത്തുമെന്ന് റിപ്പോര്‍ട്ടുകളുണ്ടായിരുന്നെങ്കിലും ഇരു ചിത്രങ്ങളുടേയും റിലീസ് തിയ്യതി ഇതുവരേയും സ്ഥിരീകരിച്ചിട്ടില്ല.
അടുത്തിടെ പുറത്തിറങ്ങിയ വേള്‍ഡ് ഓഫ് വേട്ടുവം വിഡിയോക്ക് വന്‍ സ്വീകരണമാണ് ലഭിച്ചത്. തമിഴ്, ഹിന്ദി, തെലുങ്ക്, കന്നഡ, മലയാളം ഭാഷകളില്‍ പുറത്തിറങ്ങിയ വിഡിയോയില്‍ ഹിന്ദിയില്‍ പങ്കജ് ത്രിപാഠി, തെലുങ്കില്‍ റാണ ദഗ്ഗുബട്ടി, മലയാളത്തില്‍ സൗബിന്‍ ഷാഹിര്‍, കന്നഡയില്‍ കിച്ച സുദീപ്, തമിഴില്‍ പാ രഞ്ജിത്ത് എന്നിവര്‍ അണിനിരന്നു.
അപ്പോക്കലിപ്‌സ് പശ്ചാത്തലത്തില്‍ വമ്പന്‍ ആക്ഷന്‍ രംഗങ്ങളോടെ ഒരുക്കുന്ന 'വേട്ടുവം', വ്യത്യസ്ത വിഭാഗങ്ങള്‍ക്കിടയിലെ ആധിപത്യത്തിനായുള്ള പോരാട്ടവും സംഘര്‍ഷങ്ങളും അതില്‍ നിന്നുണ്ടാകുന്ന അപ്രതീക്ഷിത സംഭവവികാസങ്ങളുമാണ് പ്രധാനമായും അവതരിപ്പിക്കുന്നത്. വ്യത്യസ്തമായ ഒരു ലോകത്തിന്റെ ദൃശ്യാവിഷ്‌കാരം, ഗംഭീരമായ ദൃശ്യങ്ങള്‍, ശക്തമായ ആക്ഷന്‍ രംഗങ്ങള്‍ എന്നിവ ചിത്രത്തിന്റെ പ്രധാന ആകര്‍ഷണങ്ങളാണ്.
ചിത്രത്തിലെ ആക്ഷന്‍ രംഗങ്ങള്‍ അടിമുറൈ, മാല്‍ഖംബ് തുടങ്ങിയ പരമ്പരാഗത ആയോധനകലകളെ അടിസ്ഥാനമാക്കിയാണ് രൂപകല്‍പ്പന ചെയ്തിരിക്കുന്നത്. ഇതിനായി ചിത്രത്തിലെ അഭിനേതാക്കള്‍ പ്രത്യേകമായി മാര്‍ഷല്‍ ആര്‍ട്‌സ് പരിശീലനം നേടിയിട്ടുണ്ട്. അതിലൂടെ ആക്ഷന്‍ രംഗങ്ങള്‍ക്ക് കൂടുതല്‍ സ്വാഭാവികതയും പ്രേക്ഷകര്‍ക്ക് വ്യത്യസ്തമായ ദൃശ്യാനുഭവവും നല്‍കുന്ന രീതിയിലാണ് ചിത്രീകരണം നടത്തിയിരിക്കുന്നത്.
ആര്യ, ദിനേഷ്, ഷബീര്‍, ശോഭിത ധൂലിപാല, കലൈയരസന്‍ തുടങ്ങിയ പ്രമുഖ താരങ്ങള്‍ പ്രധാന വേഷങ്ങളിലെത്തുന്ന ചിത്രം, വിശാലമായ കഥാലോകവും ആവേശകരമായ ആക്ഷനും കൊമേഴ്‌സ്യല്‍ ഘടകങ്ങളും സമന്വയിപ്പിച്ചാണ് ഒരുക്കുന്നത്.
'വേട്ടുവം' തമിഴ്, തെലുങ്ക്, മലയാളം, കന്നഡ, ഹിന്ദി ഭാഷകളില്‍ പാന്‍ ഇന്ത്യന്‍ ചിത്രമായി റിലീസ് ചെയ്യും. ചിത്രം പ്രഖ്യാപിച്ചതുമുതല്‍ ഇതിന്റെ വിശാലമായ കഥാലോകവും പാ. രഞ്ജിത്തിന്റെ സംവിധാനവും ഇന്ത്യന്‍ സിനിമാ മേഖലയില്‍ ശ്രദ്ധ നേടിയിട്ടുണ്ട്. രാജ്യവ്യാപകമായി ശ്രദ്ധേയനായ സംവിധായകന്‍ എന്ന നിലയില്‍ പാ. രഞ്ജിത്തിനുള്ള സ്ഥാനം 'വേട്ടുവം' എന്ന ചിത്രത്തെക്കുറിച്ച് വിവിധ സിനിമാ മേഖലകളില്‍ വലിയ പ്രതീക്ഷകള്‍ സൃഷ്ടിച്ചിട്ടുണ്ട്.
ചിത്രത്തിന്റെ കലാസംവിധാനം എസ്. എസ്. മൂര്‍ത്തി നിര്‍വഹിക്കുമ്പോള്‍, ഛായാഗ്രഹണം രൂപേഷ് ഷാജി, എഡിറ്റിംഗ് ആര്. കെ. സെല്‍വ എന്നിവരാണ് നിര്‍വഹിക്കുന്നത്. ജി. വി. പ്രകാശ് കുമാര്‍ സംഗീതം ഒരുക്കുന്നു. ദിലീപ് സുബ്ബരായന്‍ ആണ് സ്റ്റണ്ട് ഡയറക്ടര്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
