'ദയവ് ചെയ്ത് കാര്യങ്ങൾ സങ്കീർണമാക്കരുത്, കൃത്യസമയത്ത് എത്താൻ പറ്റാത്തതിന്റെ സങ്കടം പറഞ്ഞതാണ്'; വൈറൽ വിഡിയോയിൽ പാർവതി കൃഷ്ണ

'ഇറ്റ്സ് എ മെഡിക്കൽ മിറക്കിൾ' എന്ന ചിത്രത്തിന്റെ പ്രൊമോഷൻ ചടങ്ങിനിടെ സംവിധായകൻ ശ്യാമിൻ ​ഗിരീഷ് നടി പാർവതി കൃഷ്ണയുടെ കയ്യിൽ സ്പർശിച്ചു എന്ന തരത്തിൽ വിഡിയോകൾ പ്രചരിച്ചിരുന്നു. എന്നാൽ ഇത്തരം പ്രചാരണങ്ങൾ തെറ്റാണെന്നും അനാവശ്യമായി കാര്യങ്ങൾ സങ്കീർണമാക്കരുതെന്നും പറയുകയാണ് പാർവതി ഇപ്പോൾ.

പ്രൊമോഷൻ ചടങ്ങിനിടെ ഓടിവന്ന് സോഫയിൽ ഇരുന്ന പാർവതിയോട് സംസാരിക്കാനായി ശ്യാമിനും അദ്ദേഹത്തിന്റെ ഭാര്യയും ചിത്രത്തിന്റെ തിരക്കഥാകൃത്തുമായ നിലീൻ സാന്ദ്രയും അടുത്തേക്ക് വന്നിരുന്ന വിഡിയോയാണ് ചർച്ചയായത്. അസ്വസ്ഥയായിരിക്കുന്ന പാർവതിയെയാണ് വിഡിയോയിൽ കാണാനാകുന്നത്. ഇതാണ് കാണുന്നവരിൽ തെറ്റിദ്ധാരണയ്ക്ക് ഇടയാക്കിയത്.

തങ്ങൾ നല്ല സുഹൃത്തുക്കളാണെന്നും കൃത്യസമയത്ത് പരിപാടിക്ക് എത്താൻ കഴിയാത്തതിന്റെ സങ്കടം പറഞ്ഞപ്പോൾ അവർ ആശ്വസിപ്പിച്ചതാണെന്നുമാണ് പാർവതി സോഷ്യൽ മീഡിയ കമന്റിലൂടെ വ്യക്തമാക്കിയത്. "ഞങ്ങൾ നല്ല സുഹൃത്തുക്കളാണ്... അയ്യോ ദയവ് ചെയ്ത് കാര്യങ്ങൾ സങ്കീർണമാക്കരുത്... കൃത്യസമയത്ത് എത്താൻ പറ്റാത്തതിന്റെ സങ്കടം പറഞ്ഞതാണ് ഞാൻ... അവർ എന്നെ ആശ്വസിപ്പിച്ചെന്നേയുള്ളൂ".- പാർവതി കുറിച്ചു.

എന്തിനാണ് സംവിധായകൻ പൊതുവേദിയിൽ വച്ച് നടിയുടെ കയ്യിൽ വീണ്ടും വീണ്ടും മനഃപൂർവം സ്പർശിക്കുന്നതെന്നതായിരുന്നു വിഡിയോയിൽ വന്ന പ്രധാന വിമർശനം. ഈ വിഡിയോ സോഷ്യൽ മീഡിയയിൽ വൈറലാണ്.

നിലീൻ സാന്ദ്രയുടെ തിരക്കഥയിൽ ശ്യാമിൻ ഗിരീഷ് സംവിധാനം ചെയ്ത 'ഇറ്റ്സ് എ മെഡിക്കൽ മിറക്കിൾ' എന്ന ചിത്രം ഇന്നാണ് തിയറ്ററുകളിൽ എത്തുന്നത്. സംഗീത് പ്രതാപ് നായകനാകുന്ന ചിത്രത്തിൽ പാർവതി കൃഷ്ണയും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.