'എന്ത് ആക്ടിവിസം പറഞ്ഞാലും നിലപാട് എടുത്താലും, അതിന്റെ പേരിൽ പ്രേക്ഷകർ ഒരിക്കലും നമ്മുടെ സിനിമയെ തള്ളിക്കളയില്ല'

'പ്രഥമ ദൃഷ്ട്യാ കുറ്റക്കാർ' എന്ന സിനിമയുടെ വിജയത്തിളക്കത്തിലാണ് നടി പാർവതി തിരുവോത്തിപ്പോൾ. സിനിമയിൽ 20 വർഷം തികയ്ക്കുന്ന സമയത്ത് തന്നെ ഇത്തരമൊരു വലിയ വിജയം ലഭിച്ചത് തനിക്ക് ഒരു ബോണസ് പോയ്ന്റാണെന്ന് പറയുകയാണ് നടി ഇപ്പോൾ. മാതൃഭൂമി വാരാന്തപ്പതിപ്പിന് നൽകിയ അഭിമുഖത്തിലാണ് പാർവതി ഇക്കാര്യം പറഞ്ഞത്.

അതേസമയം, 'പ്രഥമ ദൃഷ്ട്യാ കുറ്റക്കാർ' തിയറ്ററുകളിൽ പ്രദർശനം തുടരുകയാണ്. സിപിഒ അലീന എന്ന കഥാപാത്രമായാണ് ചിത്രത്തിൽ പാർവതി എത്തിയത്. "സിനിമയിൽ ഞാൻ 20 വർഷം തികയ്ക്കുകയാണ്. ആ സമയത്ത് തന്നെ ഇത്തരമൊരു വലിയ വിജയം ലഭിച്ചത് ഒരു ബോണസ് പോയ്ന്റാണ്.

ഈ വിജയം വളരെയധികം സ്പെഷ്യലാണ്. രണ്ട് ദശാബ്ദത്തിനിടയിൽ ചെയ്ത ഭൂരിഭാ​ഗം സിനിമകളും കഥാപാത്രങ്ങളും പ്രേക്ഷകർ ഏറ്റെടുക്കുകയും വലിയ വിജയങ്ങളാക്കുകയും ചെയ്തിട്ടുണ്ട്. 'ചാർലി', 'ഉയരെ', 'ടേക്ക് ഓഫ്', 'ബാം​ഗ്ലൂർ ഡെയ്സ്', 'എന്ന് നിന്റെ മൊയ്ദീൻ' തുടങ്ങി ഒട്ടേറെ സിനിമകൾ. സോഷ്യൽ മീഡിയയിൽ എനിക്കെതിരെ ഒരുപാട് ട്രോളുകൾ വരുകയും സൈബർ ആക്രമണം നടക്കുകയും ചെയ്യുന്ന സമയത്താണ് 'ഉയരെ' എന്ന സിനിമ റിലീസ് ചെയ്യുന്നതും അത് പ്രേക്ഷകർ വലിയ വിജയമാക്കുകയും ചെയ്തത്.

അപ്പോൾ മുതൽ ഞാൻ മനസിലാക്കിയ കാര്യം, നമ്മൾ എന്തുതരം ആക്ടിവിസം പറഞ്ഞാലും നിലപാട് എടുത്താലും അതിന്റെ പേരിൽ ഒരിക്കലും പ്രേക്ഷകർ നമ്മുടെ സിനിമയെ തള്ളിക്കളയില്ല എന്നതാണ്. നല്ല സിനിമയും മികച്ച പ്രകടനവുമാണെങ്കിൽ പ്രേക്ഷകർ എന്നെ എപ്പോഴും നിറഞ്ഞ മനസോടെ സ്വീകരിച്ചിട്ടുണ്ട്.

കൂടുതല്‍ സിനിമ വാര്‍ത്തകള്‍ക്കായി വാട്സ്ആപ്പ് ഗ്രൂപ്പില്‍ അംഗമാകൂ

ഇവിടെ ക്ലിക്ക് ചെയ്യുക

അതിലെനിക്ക് ഏറെ സന്തോഷമുണ്ട്. ഞാൻ കേന്ദ്ര കഥാപാത്രമാകുന്ന ഒരു സിനിമ ഒരു വലിയ ഇടവേള കഴിഞ്ഞാണ് തിയറ്ററുകളിലെത്തിയത്. 'പ്രഥമ ദൃഷ്ട്യാ കുറ്റക്കാർ' എന്ന സിനിമ വലിയ വിജയമാക്കിയതിന് എല്ലാവരെയും നന്ദി അറിയിക്കുന്നു".- പാർവതി തിരുവോത്ത് പറഞ്ഞു.