'കടുത്ത ഏകാന്തത, ആത്മഹത്യയെക്കുറിച്ച് ചിന്തിച്ച നാളുകള്‍, ആ രണ്ട് മാസം നടന്നതൊന്നും എനിക്ക് ഓര്‍മയില്ല'; വെളിപ്പെടുത്തി പാര്‍വതി

മാനസികാരോഗ്യത്തെക്കുറിച്ച് തുറന്ന് പറഞ്ഞ് നടി പാര്‍വതി തിരുവോത്ത്. കടുത്ത ഏകാന്തതയിലൂടെയും ആത്മഹത്യാ ചിന്തകളിലൂടേയും താന്‍ കടന്നു പോയിട്ടുണ്ടെന്നും പാര്‍വതി പറയുന്നു. തെറാപ്പിയെ സൃഷ്ടിച്ചതിന് ദൈവത്തോട് താന്‍ നന്ദി പറയുകയാണെന്നും പാര്‍വതി പറയുന്നു. ഹൗട്ടര്‍ഫ്‌ളൈയ്ക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു പാര്‍വതി.

''തെറാപ്പി സൃഷ്ടിച്ചതിന് ദൈവത്തോട് നന്ദി പറയുന്നു. തെറാപ്പിയോട് ഞാന്‍ കടപ്പെട്ടിരിക്കുന്നു. പക്ഷെ എന്റെ ഇപ്പോഴത്തെ തെറാപ്പിസ്റ്റിനെ കണ്ടെത്തുന്നത് വരെ ഒരുപാട് മോശം തെറാപ്പിസ്റ്റുകളിലൂടെ കടന്നു പോയിട്ടുണ്ട്. മാത്രമല്ല, പൊതുജീവിതത്തില്‍ ഞാന്‍ എന്താണെന്ന ഗേസ് ഇല്ലാത്തൊരു തെറാപ്പിസ്റ്റിനെ കണ്ടെത്തുകയും പ്രയാസമായിരുന്നു. ആദ്യത്തെ തെറാപ്പിസ്റ്റ് വിദേശിയായിരുന്നു. അവരുടെ സമയത്തിന് അനുസരിച്ച് പുലര്‍ച്ചെ ഒരു മണിക്കും രണ്ട് മണിക്കുമായിരുന്നു എന്റെ തെറപ്പി.'' താരം പറയുന്നു.

''തെറപ്പിയിലൂടെ കടന്നു പോവുകയെന്നതും വേദനാജനകമാണ്. കടുത്ത ഏകാന്തത അനുഭവിച്ചിരുന്നു. പല തെറാപ്പിസ്റ്റുകളേയും പരീക്ഷിച്ചു. ഒന്നും ശരിയായില്ല. എന്നെ സുഖപ്പെടുത്താന്‍ സാധിക്കില്ലെന്നാണ് കരുതിയത്. വളരെ ഇരുണ്ട ഘട്ടത്തിലെത്തി. ആത്മഹത്യാചിന്ത വേറെ തലത്തിലായിരുന്നു. അവസാനത്തെ സംഭവം 2021 ലാണ്. വളരെ അടുത്തതാണത്.'' താരം പറയുന്നു.

ആ സമയത്ത് നടന്ന പല കാര്യങ്ങളും തനിക്ക് ഓര്‍മ പോലുമില്ലെന്നും പാര്‍വതി പറയുന്നുണ്ട്. ''2021 ജനുവരിയും ഫെബ്രുവരിയും എനിക്ക് ഓര്‍മ പോലുമില്ല. ആ സമയം ബ്ലര്‍ ആണ് എനിക്ക്. ആ കാലം ഞാന്‍ ഓര്‍ത്തെടുക്കുന്നത് ഫോണിലെ ഗ്യാലറി കാണുമ്പോഴാണ്. അതല്ലാതെ ആ സമയത്തെക്കുറിച്ച് എനിക്ക് യാതൊരു ഓര്‍മയുമില്ല. ഇപ്പോള്‍ എനിക്ക് തരത്തിലുള്ള തെറാപ്പിസ്റ്റുകളുണ്ട്. ഒന്ന് ഇഎംഡിയും, മറ്റൊന്ന് സെക്‌സ് തെറാപ്പിസ്റ്റും'' എന്നാണ് പാര്‍വതി പറയുന്നത്.