സ്ത്രീത്വത്തെ അപമാനിച്ചെന്ന് പരാതി; നടൻ വിനായകനെതിരെ കേസ്

ആലപ്പുഴ: നടൻ വിനായകനെതിരെ സ്ത്രീത്വത്തെ അപമാനിച്ചതിന് കേസെടുത്ത് പൊലീസ്. ആലപ്പുഴ മാവേലിക്കര പൊലീസാണ് വിനായകനെതിരെ കേസെടുത്തത്. ബോംബെയിൽ ജോലി ചെയ്യുന്ന തഴക്കര സ്വദേശിയുടെ പരാതിയിലാണ് കേസെടുത്തത്.

പരാതിക്കാരന്റെ പ്രായപൂർത്തിയാകാത്ത മകളുടെ ചിത്രം വിനായകൻ ഫെയ്സ്ബുക്കിൽ പങ്കുവച്ചിരുന്നു. കഴിഞ്ഞ വർഷം ജൂലൈയിൽ ആയിരുന്നു കേസിനാസ്പദമായ സംഭവം. നടനെ താൻ വിമർശിച്ചതിന്റെ പേരിൽ പ്രായപൂർത്തിയാകാത്ത തന്റെ മകളുടെ ചിത്രമുൾപ്പെടെ പങ്കുവച്ചു കൊണ്ട് രൂക്ഷമായ ഭാഷയിൽ നടൻ പ്രതികരിച്ചു എന്ന് പരാതിയിൽ പറയുന്നു.

ആലപ്പുഴയിൽ വെച്ച് നടന്ന ബാലാവകാശ കമ്മീഷന്റെ സിറ്റിങ്ങിൽ പൊലീസിന് കമ്മീഷൻ കേസെടുക്കാൻ നിർദ്ദേശം നൽകിയതോടെയാണ് എഫ്ഐആർ ഇട്ടത്.