ഗായിക മരീലിയ മെന്തോന്‍സ വിമാനാപകടത്തില്‍ മരിച്ചു

​

റിയോഡി ജനീറ: ബ്രസീലിയന്‍ ഗായിക മരീലിയ മെന്തോന്‍സ വിമാനാപകടത്തില്‍ മരിച്ചു.  26 വയസായിരുന്നു. സംഗീതപരിപാടിക്കായുള്ള യാത്രക്കിടെ മരീലിയ സഞ്ചരിച്ചിരുന്ന ചെറുവിമാനം തകർന്നു വീഴുകയായിരുന്നു. അപകടത്തിൽ മരീലിയയുടെ അമ്മാവനും നിർമാതാവും രണ്ട് പൈലറ്റുമാരും അപകടത്തിൽ മരിച്ചു. വെള്ളിയാഴ്ചയാണ് അപകടമുണ്ടായത്. 

അപകടം സം​ഗീതപരിപാടിക്ക് പോകുന്നതിനിടെ

സംഗീതപരിപാടിക്കായാണ് താരം ബ്രസീലിയന്‍ നഗരമായ കാരതിങ്കയിലേക്ക് പുറപ്പെട്ടത്. എന്നാൽ മിനാസ് ​ഗെറേസ് സ്റ്റേറ്റിലെ ഉൾപ്രദേശത്തിൽ വിമാനം തകർന്നു വീഴുകയായിരുന്നു. അപകടകാരണത്തെ കുറിച്ച് അന്വേഷണം ആരംഭിച്ചതായി അധികൃതര്‍ അറിയിച്ചു. പ്രദേശത്ത് സ്ഥാപിച്ചിട്ടുള്ള പവര്‍ ആന്റിനയുമായി വിമാനം കൂട്ടിയിടിച്ചിട്ടുണ്ടാവാമെന്ന് കരുതുന്നതായി പ്രാദേശിക പോലീസ് മേധാവി ഇവാന്‍ ലോപസ് സൂചിപ്പിച്ചു. വെള്ളച്ചാട്ടത്തിന് സമീപത്തുള്ള പാറക്കെട്ടുകളിലാണ് വിമാനത്തിന്റെ തകര്‍ന്നുവീണ ഭാഗങ്ങള്‍ കണ്ടെത്തിയത്. 

​ഗ്രാമി അവാർഡ് വിന്നർ

ലാറ്റിന്‍ ഗ്രാമി അവാര്‍ഡ് ജേതാവായ മരീലിയ മെന്തോന്‍സയ്ക്ക് ലോകമെമ്പാടും നിരവധി ആരാധകരുണ്ട്. അപകടം നടക്കുന്നത് ഒരു മണിക്കൂർ മുൻപേ താരം വിമാനത്തിൽ നിന്നുള്ള വിഡിയോ സോഷ്യൽ മീഡിയയിൽ പങ്കുവച്ചിരുന്നു. യൂട്യൂബില്‍ രണ്ട് കോടി ഫോളേവേഴ്‌സുള്ള മരീലിയയ്ക്ക് സ്‌പോട്ടിഫൈയില്‍ എണ്‍പത് ലക്ഷം ശ്രോതാക്കളാണുള്ളത്. മരീലിയയുടെ ഗാനങ്ങളെല്ലാം തന്നെ വന്‍ ഹിറ്റുകളാണ്.