പ്രണയിച്ച് രജനികാന്തും നയൻതാരയും, മനസു നിറച്ച് 'സാര കാട്രേ'; അണ്ണാത്തെയിലെ ​ഗാനം പുറത്ത്

സൂപ്പർസ്റ്റാർ രജനികാന്ത് നായകനായെത്തുന്ന അണ്ണാത്തെ വളരെ പ്രതീക്ഷയോടെയാണ് ആരാധകർ കാത്തിരിക്കുന്നത്. നയൻതാര നായികയായി എത്തുന്ന ചിത്രത്തിലെ പുതിയ ​ഗാനം പുറത്തുവന്നിരിക്കുകയാണ്. രജനിയുടേയും നയൻസിന്റേയും പ്രണയം നിറയുന്ന ​ഗാനം ആരാധകരുടെ മനസു കീഴടക്കുകയാണ്. 

'സാര കാട്രേ' എന്ന് തുടങ്ങുന്ന ​ഗാനം ശ്രേയാ ഘോഷാലും സിദ് ശ്രീറാമും ചേർന്നാണ് ആലപിച്ചിരിക്കുന്നത്. യു​ഗഭാരതിയുടെ വരികൾക്ക് ഡി ഇമ്മനാണ് സം​ഗീതം നൽകിയിരിക്കുന്നത്. രജനീകാന്തിന്റേയും നയൻതാരയുടേയും ചിത്രത്തിലെ സ്റ്റിൽസിനൊപ്പമാണ് ​ഗാനം. 

ദർബാറിന് ശേഷം നയൻതാര വീണ്ടും രജനിയുടെ നായികയായെത്തുന്ന ചിത്രമാണ് അണ്ണാത്തെ. അന്തരിച്ച പ്രിയ ​ഗായകൻ എസ്.പി ബാലസുബ്രഹ്മണ്യം അവസാനമായി ആലപിച്ച ​അണ്ണാത്തെയിലെ ഗാനം നേരത്തെ പുറത്തുവന്നിരുന്നു. സിരുത്തെ ശിവ സംവിധാനം ചെയ്യുന്ന ചിത്രത്തിൽ കീർത്തി സുരേഷ്, മീന, ഖുശ്ബു , പ്രകാശ് രാജ്, സൂരി തുടങ്ങിയവരും പ്രധാന വേഷത്തിലെത്തുന്നുണ്ട്. ദീപാവലി റിലീസായി നവംബർ 4ന് ചിത്രം തീയേറ്ററുകളിൽ പ്രദർശനത്തിനെത്തും.