കന്നഡ സൂപ്പര് താരം യഷിനെതിരെ നടി ഋഷീക സിങ്. യഷിന്റെ പുതിയ ചിത്രമായ ടോക്സിക്കിനെതിരെയും കടുത്ത ഭാഷയില് വിമര്ശിക്കുന്ന നടിയുടെ വിഡിയോ വൈറലാവുകയാണ്. ചിത്രത്തിലെ ഇന്റിമേറ്റ് രംഗങ്ങളെ ചൊല്ലിയാണ് വിമര്ശനം. എങ്ങനെയാണ് ഇത്തരം രംഗങ്ങളുള്ള സിനിമയുടെ ഭാഗമാകാന് സാധിക്കുന്നതെന്നാണ് നടി യഷിനോട് ചോദിക്കുന്നത്.
സ്ത്രീകളെ ബഹുമാനിച്ചില്ലെങ്കില് കര്ണാടകയില് നിന്നും പുറത്താക്കുമെന്നും ഋഷീക പറയുന്നുണ്ട്. നടിയുടെ പ്രതികരണത്തിനെതിരെ യഷ് ആരാധകര് രംഗത്തെത്തിയിട്ടുണ്ട്. കഴിഞ്ഞ ദിവസം പുറത്തിറങ്ങിയ ടോക്സിക്കിന്റെ ട്രെയിലറിനെതിരെയാണ് നടി രംഗത്തെത്തിയിരിക്കുന്നത്. ഭര്ത്താവും അച്ഛനുമായ യഷ് സ്ത്രീകളോട് കുറേക്കൂടി ബഹുമാനത്തോടെ പെരുമാറണം എന്നാണ് ഋഷീക പറയുന്നത്.
ട്രെയിലറിലെ രംഗങ്ങള് തനിക്ക് അംഗീകരിക്കാനാകില്ലെന്നാണ് നടി പറയുന്നത്. ''സ്ത്രീകളെ ബഹുമാനിച്ചില്ലെങ്കില്, നിങ്ങള് ഞങ്ങള് കര്ണാടകയില് നിന്നും പുറത്താക്കും'' എന്നാണ് ഋഷീക പറയുന്നത്. വിഡിയോ വൈറലായതോടെ നിരവധി പേരാണ് നടിക്കെതിരെ രംഗത്തെത്തിയിരിക്കുന്നത്. ചിത്രത്തെക്കുറിച്ചുള്ള നടിയുടെ വിമര്ശനം ബാലിശമാണെന്നാണ് ആരാധകര് പറയുന്നത്.
യഷിനൊപ്പം അഭിനയിച്ചതിനെക്കുറിച്ച് ചിത്രത്തിലെ നടിമാര് സംസാരിച്ചതും ആരാധകര് ചൂണ്ടിക്കാണിക്കുന്നുണ്ട്. അതേസമയം നടി അഭിനയിച്ച ചിത്രങ്ങളിലെ രംഗങ്ങളും നടിയുടെ ഫോട്ടോഷൂട്ടുകളും കുത്തിപ്പൊക്കിയും ചിലര് നടനെ പ്രതിരോധിക്കുന്നുണ്ട്. ഇതിനിടെ നടിയെ പിന്തുണച്ചും ആളുകളെത്തുന്നുണ്ട്. വിമര്ശനത്തോട് യഷ് ഇതുവരേയും പ്രതികരിച്ചിട്ടില്ല.
കന്നഡയിലെ പ്രമുഖ ചലച്ചിത്ര പ്രവര്ത്തകന് രാജേന്ദ്ര സിംഗ് ബാബുവിന്റെ മകള് കൂടിയാണ് ഋഷികാ സിംഗ്. 'കള്ള മല്ല സുള്ള', 'ബെങ്കി ബിരുഗാളി', 'കണ്ഠീരവ', 'തുണ്ടാരു' തുടങ്ങിയ സിനിമകളിലൂടെയാണ് അവര് ശ്രദ്ധേയയായത്. കൂടാതെ ബിഗ് ബോസ് കന്നഡ ആദ്യ സീസണിലെ മത്സരാര്ത്ഥിയുമായിരുന്നു അവര്. അതേസമയം യഷിനെ നായകനാക്കി ഗീതു മോഹന്ദാസ് ഒരുക്കുന്ന ചിത്രമാണ് ടോക്സിക്. നയന്താര, കിയാര അദ്വാനി, ഹുമ ഖുറേഷി, താര സുതാരിയ തുടങ്ങിയ വന് താരനിരയും ചിത്രത്തിലുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
