'മിഴിയിൽ നിന്നും മിഴിയിലേക്ക്...' മായാനദി റീ റിലീസിന്; വിവരങ്ങൾ പങ്കുവച്ച് നിർമാതാവ്

പ്രണയത്തിന്റെയും പകപോക്കലിന്റെയും കഥ അതിമനോഹരമായി പ്രേക്ഷകരിലേക്കെത്തിച്ച സിനിമയാണ് മായാനദി. മാത്തൻ എന്ന കഥാപാത്രമായി ടൊവിനോ ചിത്രത്തിലെത്തിയപ്പോൾ അപർണ എന്ന കഥാപാത്രത്തെയാണ് ഐശ്വര്യ ലക്ഷ്മി ചിത്രത്തിൽ അവതരിപ്പിച്ചത്. ഇപ്പോഴിതാ മലയാളികൾ ആഘോഷമാക്കിയ ഈ ആഷിഖ് അബു ചിത്രം റീ റിലീസിനൊരുങ്ങുകയാണ്.

അടുത്തവർഷം വാലന്റൈൻസ് ദിനത്തിൽ ചിത്രത്തിന്റെ റീ റിലീസ് ഉണ്ടാകുമെന്ന് പറയുകയാണ് ചിത്രത്തിന്റെ നിർമാതാവായ സന്തോഷ് ടി കുരുവിള. ചിത്രം വീണ്ടും റിലീസ് ചെയ്യാൻ വലിയ പൈസ ചെലവൊന്നും ഉണ്ടാകില്ലെന്നും അദ്ദേഹം പറഞ്ഞു. ക്ലബ്ബ് എഫ്എമ്മിന് നൽകിയ അഭിമുഖത്തിലാണ് സന്തോഷ് ഇക്കാര്യം പറഞ്ഞത്.

മായാനദി തിയറ്ററിൽ അത്ര ഹിറ്റായിരുന്നില്ലെന്നും എന്നാൽ ധാരാളം പ്രശംസകൾ ലഭിച്ചുവെന്നും അദ്ദേഹം പറഞ്ഞു. സാമ്പത്തികമായി അത്ര വലിയ വിജയം നേടിയ ചിത്രമായിരുന്നില്ല മായാനദിയെന്നും അദ്ദേഹം കൂട്ടിച്ചേർത്തു. ചിത്രത്തിന് രണ്ടാം ഭാ​ഗമുണ്ടാകുമോ എന്ന ചോദ്യത്തോടും സന്തോഷ് ടി കുരുവിള പ്രതികരിച്ചു.

"മായാനദിയ്ക്ക് രണ്ടാം ഭാ​ഗം ഉണ്ടാകുമോ ഇല്ലെയോ എന്ന് അതിന്റെ സംവിധായകനും എഴുത്തുകാരനും മാത്രമേ പറയാൻ കഴിയുകയുള്ളൂ. സിനിമ എന്റേതാണ്. റീബൽ സിനിമാസിന്റേതാണ്. ശ്യാം പുഷ്കരനും ആഷിഖ് അബുവും വിചാരിച്ചാൽ സിനിമയുടെ രണ്ടാം ഭാ​ഗം ഉണ്ടായിരിക്കും".- സന്തോഷ് ടി കുരുവിള പറഞ്ഞു.

അതോടൊപ്പം ആർക്കറിയാം എന്ന ചിത്രവും റീ റിലീസിനെത്തുന്നുണ്ടെന്ന് അ​ദ്ദേഹം പറഞ്ഞു. ആ സിനിമ തിയറ്ററിൽ വന്ന് മൂന്നാം ദിവസം കോവിഡ് കാരണം തിയറ്റർ അടച്ചു പോയിരുന്നുവെന്നും അതുകൊണ്ട് തിയറ്ററിൽ സിനിമ പ്രതീക്ഷിച്ച അത്ര ഓടിയില്ലെന്നും സന്തോഷ് വ്യക്തമാക്കി. 2017 ലാണ് മായാനദി പുറത്തിറങ്ങുന്നത്.

ജയേഷ് മോഹന്റെ ഛായാ​ഗ്രഹണവും റെക്സ് വിജയന്റെ സം​ഗീതവും ചിത്രത്തെ കൂടുതൽ മനോഹരമാക്കി. സാനു ജോൺ വർഗീസ് സംവിധാനം ചെയ്ത ആർക്കറിയം 2021 ലാണ് തിയറ്ററുകളിലെത്തുന്നത്. ബിജു മേനോൻ, പാർവതി, ഷറഫുദ്ദീൻ തുടങ്ങിയവരാണ് ചിത്രത്തിൽ പ്രധാന വേഷങ്ങളിലെത്തിയത്.