അല്ലു അർജുനും മഹേഷ് ബാബുവും ഒന്നുമല്ല; തെലുങ്കിലെ ഇഷ്ട നടൻ ആരാണെന്ന് പറഞ്ഞ് സാറ അർജുൻ

‘ധുരന്ധർ’ എന്ന സൂപ്പർ ഹിറ്റ് ചിത്രത്തിനു ശേഷം സാറ അർജുൻ പ്രധാന വേഷത്തിലെത്തുന്ന തെലുങ്ക് സിനിമയാണ് ‘യൂഫോറിയ’. ചിത്രത്തിന്റെ ട്രെയ്‌ലർ ലോഞ്ച് ഇന്ന് ഹൈദരാബാദിൽ വച്ചു നടന്നു. ഗുണശേഖർ സംവിധാനം ചെയ്യുന്ന ചിത്രം 19 കാരിയായ പെൺകുട്ടിയുടെ ജീവിതത്തിലുണ്ടാകുന്ന അപ്രതീക്ഷിത സംഭവങ്ങളെക്കുറിച്ചാണ് പറയുന്നത്.

ട്രെയ്‌ലർ ലോഞ്ചിൽ സാറ പറഞ്ഞ വാക്കുകൾ ശ്രദ്ധേയമാകുകയാണിപ്പോൾ. "ഒരുപാട് നാളുകൾക്ക് ശേഷം തെലുങ്ക് പ്രേക്ഷകർക്ക് മുന്നിൽ നിൽക്കാൻ കഴിഞ്ഞതിൽ എനിക്ക് ഒരുപാട് സന്തോഷമുണ്ട്. എനിക്ക് ഇത് വളരെ സ്പെഷ്യൽ ആണ്. ഇവിടെയുള്ള ആളുകൾ സ്വീകരിക്കുന്ന രീതിയും ഇവിടുത്തെ സംസ്കാരവും കഥകളുമൊക്കെ എനിക്ക് ഇഷ്ടമാണ്.

ഈ സിനിമ എല്ലാവരുമായി കണക്ട് ആകുമെന്ന് ഞാൻ പ്രതീക്ഷിക്കുന്നു. ഇത് വളരെ പ്രാധാന്യമുള്ള ഒരു സിനിമയാണ്". - സാറ പറഞ്ഞു. തനിക്ക് ഏറെ ഇഷ്ടമുള്ള ഒരു തെലുങ്ക് താരത്തെക്കുറിച്ചും സാറ പറഞ്ഞു. "ഒരുപാട് പേരുണ്ട്, എനിക്ക് അങ്ങനെ ഒരാളെ തിരഞ്ഞെടുക്കാൻ കഴിയില്ല. പക്ഷേ ഇപ്പോൾ എനിക്ക് ഏറ്റവും ഇഷ്ടം വിജയ് ദേവരകൊണ്ടയെ ആണ്".- സാറ കൂട്ടിച്ചേർത്തു.

"അഭിനയം എന്റെ ജോലിയായി മുന്നോട്ട് കൊണ്ടുപോകുന്നത് ഒരു വലിയ പ്രിവിലേജ് ആണെന്ന് ഞാൻ മനസിലാക്കുന്നു. ഏറ്റവും നല്ല രീതിയിൽ അത് ചെയ്യാനുള്ള ഉത്തരവാദിത്വബോധം എനിക്കുണ്ട്, അത്രമാത്രം. എന്റെ മേൽ അധികം സമ്മർദ്ദം ചെലുത്താൻ ഞാൻ ഇഷ്ടപ്പെടുന്നില്ല. മികച്ചത് ചെയ്യാൻ എനിക്ക് എപ്പോഴും ഉത്തരവാദിത്വമുണ്ടാകും."- സാറ വ്യക്തമാക്കി.

അതേസമയം ബാലതാരമായി സിനിമയിലെത്തിയ നടിയാണ് സാറ അർജുൻ. മലയാളത്തിൽ ആൻ മരിയ കലിപ്പിലാണ് എന്ന ചിത്രത്തിൽ സാറ അഭിനയിച്ചിരുന്നു. പൊന്നിയിൻ സെൽവനിലെ സാറയുടെ കഥാപാത്രവും ഏറെ ശ്രദ്ധ നേടി. രൺവീർ സിങ് നായകനായെത്തിയ ധുരന്ദറിലെ സാറയുടെ കഥാപാത്രം ഏറെ ശ്രദ്ധിക്കപ്പെട്ടു. രൺവീറിന്റെയും സാറയുടെയും പ്രായമുൾപ്പെടെ വലിയ തോതിൽ ചർച്ചയായി മാറിയിരുന്നു.