മീനയും വിനീതും ഒന്നിക്കുന്ന വെബ് സീരിസ്; 'സീക്രട്ട് സ്റ്റോറീസ്: റോസ്‌ലിൻ' ഒടിടിയിൽ എവിടെ കാണാം

മലയാളത്തിൽ ഏറെ ആരാധകരുള്ള ​ഗാനരചയിതാവ് ആണ് വിനായക് ശശികുമാർ. സീക്രട്ട് സ്റ്റോറീസ്: റോസ്‌ലിൻ എന്ന വെബ് സീരിസിലൂടെ വിനായക് തിരക്കഥാകൃത്തായി കൂടി അരങ്ങേറ്റം കുറിക്കുകയാണ്. ജിയോ ഹോട്ട്സ്റ്റാറിലൂടെ ഈ മാസം 27ന് സീരിസ് സ്ട്രീമിങ് ആരംഭിക്കും. ജീത്തു ജോസഫ് ആണ് ഷോ റണ്ണർ. സുമേഷ് നന്ദകുമാർ സംവിധാനം ചെയ്ത സീരിസ് സെൻട്രൽ അഡ്വർടൈസിങ്ങിന്റെ ബാനറിൽ മാത്യു ജോർജാണ് നിർമിക്കുന്നത്.

റോസ്‌ലിൻ എന്ന പെൺകുട്ടിയുടെ ജീവിതത്തിൽ അപ്രതീക്ഷിതമായി സംഭവിക്കുന്ന ഉദ്വേ​ഗഭരിതമായ നിമിഷങ്ങളാണ് സീരിസിൽ‌ പറയുന്നത്. സഞ്ജന ദിപു, മീന, വിനീത്, ഹക്കിം ഷാ തുടങ്ങിയവരാണ് സീരിസിൽ പ്രധാന വേഷങ്ങളിലെത്തുന്നത്. പിഎം ഉണ്ണികൃഷ്ണനാണ് ഛായാ​ഗ്രഹണം നിർവഹിക്കുന്നത്. വിഷ്ണു ശ്യാം ആണ് സം​ഗീതമൊരുക്കുന്നത്.

മലയാളം, തമിഴ്, തെലുങ്ക്, കന്നഡ, ഹിന്ദി, ബം​ഗാളി, മറാത്തി എന്നീ ഭാഷകളിൽ സീരിസ് സ്ട്രീം ചെയ്യുന്നത്. സീരിസിന്റെ ട്രെയ്‌ലറും ശ്രദ്ധ നേടിയിരുന്നു. റിയാസ് ബദർ ആണ് എഡിറ്റിങ് നിർവഹിക്കുന്നത്. ജിയോ ഹോട്ട്സ്റ്റാറിന്റെ ഒർജിനൽ സ്റ്റോറീസിലൊന്നാണ് സീക്രട്ട് സ്റ്റോറീസ്: റോസ്‌ലിൻ.

മനുഷ്യന്റെ വികാരങ്ങളിലും മറഞ്ഞിരിക്കുന്ന സത്യങ്ങളിലും വേരൂന്നിയ തനതായ കഥകൾ പറയുന്ന ഒരു ആന്തോളജി പരമ്പരയുടെ ഭാഗമാണ് 'സീക്രട്ട് സ്റ്റോറീസ്: റോസ്‌ലിൻ'. റോസ്‌ലിൻ എന്ന സ്ത്രീയെ കേന്ദ്രീകരിച്ചാണ് കഥ മുന്നേറുന്നത്. ദുരൂഹമായ ഭൂതകാലമുള്ള റോസ്‌ലിൻ്റെ രഹസ്യങ്ങളുടെ ചുരുളഴിച്ചു കൊണ്ടാണ് സീരിസ് സഞ്ചരിക്കുന്നത്.

നാടകീയതയും സസ്പെൻസും സമന്വയിക്കുന്ന മനഃശാസ്ത്രപരമായ ആഖ്യാനമാണ് ഈ വെബ് സീരീസിന്റെ പ്രത്യേകത. മൂഡ്-ഡ്രൈവൺ സ്റ്റോറി ടെല്ലിംഗിൽ മുൻപ് പ്രശംസ നേടിയിട്ടുള്ള സംവിധായകൻ ആണ് സുമേഷ് നന്ദകുമാർ.