ഒറ്റയ്ക്ക് യോ​ഗ ചെയ്യുന്ന മോഹൻലാൽ; പിറന്നാൾ ദിനത്തിൽ 'എലോൺ' ടീസർ എത്തി

മോഹൻലാലും ഷാജി കൈലാസും ഒന്നിക്കുന്ന ചിത്രം എലോണിന്റെ ടീസർ പുറത്ത്. മോഹൻലാലിന്റെ പിറന്നാൾ ദിനത്തിലാണ് ടീസർ എത്തിയത്. താരം തന്നെയാണ് ടീസർ പങ്കുവച്ചിരിക്കുന്നത്. ഫ്ളാറ്റിനുള്ളിൽ നിന്ന് യോ​ഗ ചെയ്യുന്ന മോഹൻലാലിനെയാണ് ടീസറിൽ കാണുന്നത്. 

പന്ത്രണ്ട് വര്‍ഷങ്ങളുടെ ഇടവേളയ്ക്ക് ശേഷമാണ് മോഹന്‍ലാലും ഷാജി കൈലാസും ഒന്നിക്കുന്നത്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ചിത്രത്തിന് രാജേഷ് ജയറാം തിരക്കഥ എഴുതുന്നു. അഭിനന്ദൻ രാമാനുജം ഛായാഗ്രഹണം. എ‍ഡിറ്റിങ് ഡ‍ോൺമാക്സ്. സം​ഗീതം ജേക്സ്  ബിജോയ്.‌ സിനിമയിൽ മോഹൻലാൽ മാത്രമാണ് ഏക കഥാപാത്രമായി എത്തുന്നതെന്നും സൂചനയുണ്ട്. 2

2009ൽ റിലീസ് ചെയ്ത റെഡ് ചില്ലീസ് ആണ് ഇരുവരും ഒന്നിച്ച അവസാന ചിത്രം. മോഹൻലാലും ഷാജി കൈലാസും ഒന്നിച്ചപ്പോഴെല്ലാം നിരവധി മാസ് ഡയലോ​ഗുകളാണ് പിറന്നത്. എലോണിലും ഇതിന് മാറ്റമുണ്ടാകില്ലെന്നാണ് ആരാധകരുടെ പ്രതീക്ഷ.