'മോണിക്കാ...'; ഐശ്വര്യയ്ക്കൊപ്പം തകർപ്പൻ ഡാൻസുമായി ഷൈൻ ടോം ചാക്കോ, വിഡിയോ വൈറൽ

മലയാളികളുടെ പ്രിയപ്പെട്ട യുവനടൻമാരിലൊരാളാണ് ഷൈൻ ടോം ചാക്കോ. ഇപ്പോഴിതാ ഷൈനിന്റെ ഒരു തകർപ്പൻ ഡാൻസ് വിഡിയോ ആണ് സോഷ്യൽ മീ‍ഡിയയുടെ മനം കവരുന്നത്. നടി ഐശ്വര്യ മേനോൻ ഉൾപ്പടെ മൂന്ന് പെൺകുട്ടികൾക്കൊപ്പമുള്ള ഡാൻസ് വിഡിയോ ആണ് ശ്രദ്ധ നേടുന്നത്. രജനികാന്ത് നായകനായെത്തിയ ‘കൂലി’ സിനിമയിലെ ‘മോണിക്ക’ ഗാനത്തിനാണ് താരങ്ങൾ ചുവടുവയ്ക്കുന്നത്.

ഐശ്വര്യ മേനോൻ ആണ് വിഡിയോ സമൂഹമാധ്യമങ്ങളിലൂടെ പങ്കുവച്ചത്. ടേക്കുകൾക്കിടയിലെ സമയം നൃത്തത്തിനായി മാറ്റിവച്ചപ്പോൾ എന്ന കുറിപ്പുമായാണ് വിഡിയോ പോസ്റ്റ് ചെയ്തിരിക്കുന്നത്. കറുത്ത ഹൂഡിയും കൂളിങ്ങ് ഗ്ലാസും വച്ച് വിഡിയോയിൽ പ്രത്യക്ഷപ്പെടുന്ന ഷൈന്‍‌ ആറാടുകയാണെന്നാണ് കമന്റുകൾ.

ഷൈന്റെ എനർജറ്റിക് ഡാൻസ് കാണാൻ കഴിഞ്ഞതിന്റെ സന്തോഷം നിരവധി ആരാധകർ കമന്റുകളിലൂടെ അറിയിച്ചു. നടിമാരുടെ സൗന്ദര്യവും കമന്റ് ബോക്സിൽ ചർച്ചയായി. രജനികാന്തിനെ നായകനാക്കി ലോകേഷ് കനകരാജ് ഒരുക്കിയ ‘കൂലി’യിലെ തകർപ്പൻ ഗാനമാണ് ‘മോണിക്ക’. പൂജ ഹെഗ്ഡെയ്ക്കൊപ്പം സൗബിൻ ഷാഹിറാണ് പാട്ടിൽ പ്രത്യക്ഷപ്പെടുന്നത്.

പാട്ടിന്റെ ലിറിക്കൽ വിഡിയോ പുറത്തുവന്നതിനു പിന്നാലെ സൗബിന്റെ ഡാൻസിനെ അഭിനന്ദിച്ച് നിരവധി പേരാണ് രംഗത്തെത്തിയത്. നിരവധി താരങ്ങളും ഗാനത്തിന് ചുവടുവച്ച് എത്തിയിരുന്നു. അതേസമയം മീശ ആണ് ഷൈനിന്റേതായി ഒടുവിൽ തിയറ്ററുകളിലെത്തിയ ചിത്രം.