'കേരളത്തെ ചേർത്തു നിർത്തുന്നത് മത സൗഹാർദമാണ്'; നാളുകൾക്ക് ശേഷം പൊതുവേദിയിലെത്തി യേശുദാസ്

ഒരിടവേളയ്ക്ക് ശേഷം വീണ്ടും പൊതുവേദിയിൽ എത്തി ​ഗാന​ഗന്ധർവൻ കെ ജെ യേശുദാസ്. അമേരിക്കൻ മലയാളികളുടെ ഓണാഘോഷ പരിപാടിയിലാണ് യേശുദാസ് പാട്ടും ചിന്തകളുമായി വീണ്ടുമെത്തിയത്. കേരള അസോസിയേഷൻ ഓഫ് ഡാലസ് നടത്തിയ പരിപാടിയിലാണ് യേശുദാസ് പങ്കെടുത്തത്.

കേരളത്തെ ചേർത്ത് നിർത്തുന്നത് മത സൗഹാർദമാണെന്നും അത് ചോർന്ന് പോകാതെ സംരക്ഷിക്കണമെന്നും യേശുദാസ് പറഞ്ഞു. കോവിഡ് കാലം മുതൽ അമേരിക്കയിലെ ഡാലസിൽ വിശ്രമജീവിതം നയിക്കുകയാണ് യേശുദാസ്. സമീപകാലത്തായി പൊതുവേദികളിൽ വളരെ അപൂർവമായേ അദ്ദേഹം എത്താറുള്ളൂ.

അതുകൊണ്ടുതന്നെ ഈ തിരിച്ചുവരവ് സംഗീതലോകത്തിനും പ്രവാസികൾക്കും ഒരുപോലെ അവിസ്മരണീയമായ അനുഭവമായി മാറി. കേരളത്തെ ലോകത്തിന് മുന്നിൽ എക്കാലവും ചേർത്തു നിർത്തിയിട്ടുള്ളത് ഇവിടുത്തെ അടിയുറച്ച മത സൗഹാർദമാണെന്നും, അതിൽ ഒരു തരത്തിലുള്ള പോറൽ പോലും ഏൽക്കാതെ നാം ഓരോരുത്തരും കാത്തുസൂക്ഷിക്കണമെന്നും അദ്ദേഹം പറഞ്ഞു.