രാജ്യത്തെ മദ്യശാലകള്‍ അടച്ചുപൂട്ടിയാല്‍ മദ്യത്തെ കുറിച്ചുള്ള പാട്ടുകള്‍ പാടുന്നത് അവസാനിപ്പിക്കാമെന്ന് പ്രമുഖ ഗായകന്‍ ദില്‍ജിത്ത് ദോസാഞ്ജ്. മദ്യത്തേയും മയക്കുമരുന്നിനേയും അക്രമത്തേയും പ്രോത്സാഹിപ്പിക്കരുതെന്ന് പറഞ്ഞുകൊണ്ട് തെലുങ്കാന സര്‍ക്കാര്‍ നോട്ടീസ് നല്‍കിയതില്‍ പ്രതികരിക്കുകയായിരുന്നു താരം.
ദില്‍ ലുമിനാട്ടി എന്ന ഗായകന്റെ ഇന്ത്യ ടൂറിന്റെ ഭാഗമായി ഹൈദരാബാദില്‍ എത്തിയപ്പോഴാണ് നോട്ടീസ് ലഭിച്ചത്. തുടര്‍ന്ന് മദ്യം, മദ്യശാല എന്നീ വാക്കുകള്‍ക്ക് പകരമായി നാരങ്ങവെള്ളം, ഫൈവ് സ്റ്റാര്‍ എന്നുമാണ് താരം ഗാനത്തില്‍ ഉപയോഗിച്ചത്. തുടര്‍ന്ന് ഞായറാഴ്ച നടന്ന അഹമ്മദാബാദ് ഷോയില്‍ വച്ചാണ്‌നിയന്ത്രണങ്ങളെക്കുറിച്ച് തുറന്നു പറഞ്ഞത്.
'സന്തോഷ വാര്‍ത്തയുണ്ട്. ഇന്ന് എനിക്ക് നോട്ടീസ് ഒന്നും ലഭിച്ചില്ല. അതിലും സന്തോഷകരമായ വാര്‍ത്ത എന്തെന്നാല്‍ ഞാന്‍ ഇന്ന് മദ്യത്തേക്കുറിച്ച് ഒറ്റ പാട്ട് പാടാന്‍ പോകുന്നില്ല. എന്താണെന്ന് ചോദിക്കൂ. ഗുജറാത്ത് ഒരു ഡ്രൈ സംസ്ഥാനമാണ്.'- ദില്‍ജിത്ത് പറഞ്ഞു.
സംസ്ഥാനങ്ങള്‍ മദ്യ നിരോധനം ഏര്‍പ്പെടുത്തുകയാണെങ്കില്‍ താന്‍ മദ്യത്തെക്കുറിച്ചുള്ള പാട്ടു പാടില്ലെന്നും താരം പ്രതിജ്ഞ എടുത്തു. 'നമുക്കൊരു കാര്യം ചെയ്യാം നമുക്കൊരു മുന്നേറ്റം നടത്താം. സംസ്ഥാനങ്ങളെല്ലാം മദ്യനിരോധനം ഏര്‍പ്പെടുത്തിയാല്‍ അടുത്ത ദിവസം ഞാന്‍ മദ്യത്തേക്കുറിച്ച് പാടുന്നത് അവസാനിപ്പിക്കും. ഞാന്‍ പ്രതിജ്ഞ എടുക്കുകയാണ്. ഇത് സാധ്യമാകുമോ? മദ്യം വരുമാനത്തിന്റെ വലിയ ഭാഗമാകുമ്പോള്‍. കോവിഡ് കാലത്ത് മദ്യശാലകള്‍ ഒഴികെ എല്ലാം അടച്ചുപൂട്ടി. നിങ്ങള്‍ക്ക് ചെറുപ്പക്കാരെ പറ്റിക്കാനാവില്ല.'- ഗായകന്‍ കൂട്ടിച്ചേര്‍ത്തു.
താന്‍ മദ്യത്തേക്കുറിച്ചുള്ള ഗാനങ്ങള്‍ മാത്രമല്ല ഭക്തി ഗാനങ്ങളും പാടിയിട്ടുണ്ടെന്നും എന്നാല്‍ അതൊന്നും ആരും ശ്രദ്ധിക്കുന്നില്ല എന്നുമാണ് ഗായകന്‍ പറയുന്നത്. 'എന്നോട് കളിക്കാന്‍ നില്‍ക്കരുത്. എന്റെ പാട്ടുകള്‍ പാടിയിട്ട് ഞാന്‍ അങ്ങ് പോകും. നിങ്ങള്‍ എന്തിനാണ് എന്നോട് പ്രശ്‌നത്തിനു വരുന്നത്. ഞാന്‍ നിരവധി ഭക്തി ഗാനങ്ങളാണ് പാടിയിരിക്കുന്നത്. കഴിഞ്ഞ 10 ദിവസത്തിനിടെ രണ്ട് ഭക്തി ഗാനങ്ങള്‍ ഞാന്‍ പുറത്തിറങ്ങി. എന്നിട്ടും അതേക്കുറിച്ച് ആരും പറയാത്തത് എന്താണ്. പാട്ടിയാല പെഗ് എന്ന എന്റെ ഗാനത്തെക്കുറിച്ച് മാത്രമാണ് ചര്‍ച്ച. ബോളിവുഡില്‍ മദ്യത്തെക്കുറിച്ച് എത്ര പാട്ടുകളുണ്ട്.' - ദില്‍ജിത്ത് കൂട്ടിച്ചേര്‍ത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
