മമ്മൂട്ടിയെ അപമാനിച്ചട്ടില്ല: കരഞ്ഞുകൊണ്ട് ലിച്ചി

സിനിമയുടെ ഭാഗമായി നിരവധി അഭിമുഖങ്ങള്‍ നല്‍കി പുലിവാല് പിടിച്ചിരിക്കുകയാണ് ലിച്ചിയെന്ന അന്ന രേഷ്മ രാജന്‍. ഒരു ചാനലിലെ പരിപാടിയില്‍ അന്ന മമ്മൂട്ടിയെക്കുറിച്ച് നടത്തിയ പരാമര്‍ശമാണിപ്പോള്‍ എല്ലാ പ്രശ്‌നങ്ങള്‍ക്കും കാരണം. ഇത് മമ്മൂട്ടിയുടെ ആരാധകരെ പ്രകോപിപ്പിച്ചു. തുടര്‍ന്ന് സമൂഹമാധ്യമങ്ങള്‍ വഴി അന്നയ്ക്ക് കടുത്ത ആക്രമണമായിരുന്നു.

ലിജോ ജോസ് പെല്ലിശ്ശേരി സംവിധാനം ചെയ്ത അങ്കമാലി ഡയറീസിലെ ലിച്ചിയായി പ്രേക്ഷകരുടെ മനംകവര്‍ന്ന നടിയാണ് അന്ന രേഷ്മ രാജന്‍. മോഹന്‍ലാല്‍ നായകനായ വെളിപാടിന്റെ പുസ്തകത്തിലും അന്ന അഭിനയിച്ചിരുന്നു. അതിന്റെ ഭാഗമായി നടന്ന ഇന്റര്‍വ്യൂവിലാണ് അന്ന മമ്മൂട്ടിയെപ്പറ്റി പരാമര്‍ശം നടത്തിയത്. 

സമൂഹമാധ്യമങ്ങളിലൂടെയുള്ള ആക്രമണം താങ്ങാനാവാതെ സംഭവത്തെക്കുറിച്ച് വിശദീകരണവുമായി ഫെയ്‌സ്ബുക്ക് ലൈവിലൂടെ രംഗത്ത് വന്നിരിക്കുകയാണ് അന്നയിപ്പോള്‍. പൊട്ടിക്കരഞ്ഞാണ് താരത്തിന്റെ പ്രതികരണം. 

'കുസൃതി ചോദ്യമായി അവര്‍ എന്നോട് ചോദിച്ചു, മമ്മൂട്ടിയും ദുല്‍ഖറും ഒരുമിച്ചഭിനയിച്ചാല്‍ ആര് നായകനാകണമെന്ന്? ഞാന്‍ പറഞ്ഞു, ദുല്‍ഖര്‍ നായകനാകട്ടെ മമ്മൂട്ടി അച്ഛനുമെന്ന്. അതൊരു തമാശയായിരുന്നു. അല്ലാതെ മമ്മൂട്ടിയെ അപമാനിക്കാനല്ല. പക്ഷെ ആളുകളും മാധ്യമങ്ങളും അത് വളച്ചൊടിച്ചു. ഞാന്‍ മറ്റൊന്നും ഉദ്ദേശിച്ചിട്ടില്ല. അവരെയൊന്നും താരതമ്യം ചെയ്യാന്‍ ഞാന്‍ ആളല്ല' എന്നും അന്ന പറഞ്ഞു.