സ്‌കൂള്‍ പ്രവേശനത്തില്‍ പുതിയ നിബന്ധനകള്‍; ദുബൈയില്‍ പ്രായപരിധി പരിഷ്‌കരിച്ചു

ദുബൈ: ദുബൈയില്‍ സ്‌കൂള്‍ പ്രവേശനത്തില്‍ 2026-27 അധ്യയന വര്‍ഷത്തേക്ക് പുതിയ പ്രവേശന പ്രായ മാനദണ്ഡങ്ങള്‍. ഓഗസ്റ്റ്-സെപ്റ്റംബര്‍ അധ്യയന വര്‍ഷം ആരംഭിക്കുന്ന സ്‌കൂളുകളില്‍ കെജി, ഗ്രേഡ് 1 പ്രവേശനത്തിനുള്ള പ്രായപരിധി ഓഗസ്റ്റ് 31-ന് പകരം ഡിസംബര്‍ 31 ആക്കി.നിലവില്‍ പഠിക്കുന്ന കുട്ടികളെ പുതിയ നിബന്ധന ബാധിക്കില്ല.

ഓഗസ്റ്റ് അല്ലെങ്കില്‍ സെപ്റ്റംബര്‍ മാസങ്ങളില്‍ അധ്യയന വര്‍ഷം ആരംഭിച്ച സ്‌കൂളുകളിലേക്കും കിന്റര്‍ഗാര്‍ട്ടനുകളിലേക്കുമുള്ള പുതിയ അഡ്മിഷനുകള്‍ക്ക് പുതിയ മാനദണ്ഡങ്ങള്‍ ബാധകമാണ്. 2025-26ല്‍ പ്രവേശനത്തിന് അര്‍ഹത ലഭിക്കാതിരുന്ന 2021 സെപ്റ്റംബര്‍ ഒന്നു മുതല്‍ ഡിസംബര്‍ 31 വരെ ജനിച്ച കുട്ടികള്‍ക്ക് 2026-27ല്‍ കെജി1 അല്ലെങ്കില്‍ കെജി 2 തെരഞ്ഞെടുക്കാനുള്ള പ്രത്യേക ഇളവും നല്‍കിയിരുന്നു.

ഏപ്രിലില്‍ അധ്യയനവര്‍ഷം ആരംഭിക്കുന്ന ഇന്ത്യന്‍ സ്‌കൂളുകളില്‍ മാര്‍ച്ച് 31 തന്നെയാണ് കട്ട്-ഓഫ്. സ്‌കൂള്‍ മാറുകയോ വിദേശത്തുനിന്ന് ദുബായിലെത്തുകയോ ചെയ്യുന്ന കുട്ടികളെ പുതിയ പ്രായപരിധി മാത്രം അടിസ്ഥാനമാക്കി ക്ലാസില്‍ പ്രവേശിപ്പിക്കില്ല. പഠിച്ചുതീര്‍ത്ത അവസാന ക്ലാസും അംഗീകൃത സര്‍ട്ടിഫിക്കറ്റ് തുല്യതാ നടപടികളും പരിഗണിച്ചായിരിക്കും ക്ലാസ് നിശ്ചയിക്കുക.