മസ്കത്ത്: ഒമാനില് വ്യക്തികളുടെ ചിത്രങ്ങളോ, ഓഡിയോ, വിഡിയോ എന്നിവ കൃത്രിമമായി നിര്മ്മിച്ച് അപകീര്ത്തിപ്പെടുത്തുന്നത് ഗുരുതരമായ സൈബര് കുറ്റകൃത്യം. ഒമാനി സൈബര് കുറ്റകൃത്യ നിയമനിര്മ്മാണ പ്രകാരം ഇത്തം കുറ്റങ്ങള് ചെയ്യുന്നവര്ക്ക് മൂന്ന് വര്ഷം വരെ തടവ്, 5,000 ഒമാന് റിയാല് വരെ പിഴ ലഭിക്കും. അല്ലെങ്കില് രണ്ടും കൂടി ലഭിക്കാമെന്ന് പബ്ലിക് പ്രോസിക്യൂഷന് മുന്നറിയിപ്പ് നല്കി.
ഒരാളുടെ മാന്യത, ബഹുമാനം, അന്തസ് എന്നിവയെ ഹനിക്കുന്ന ഉദ്ദേശ്യത്തോടെ ശബ്ദം, വിഡിയോ, ചിത്രം എന്നിവ തിരുത്തുകയോ വ്യാജമായി അവതരിപ്പിക്കുകയോ ചെയ്യുന്നത് നിയമപ്രകാരം ശിക്ഷാര്ഹമാണെന്ന് പബ്ലിക് പ്രോസിക്യൂഷന് അറിയിച്ചു.
ഡീപ്പ്ഫേക്കുകള്, എഐ കൃത്രിമത്വം, ഡിജിറ്റല് അപകീര്ത്തിപ്പെടുത്തല് എന്നിവയുടെ വര്ധിച്ചുവരുന്ന ഭീഷണികള്, ആധുനിക ഡിജിറ്റല് ഉപകരണങ്ങള്, ജനറേറ്റീവ് എഐ ആപ്ലിക്കേഷനുകള്, ഡീപ്പ്ഫേക്ക് സാങ്കേതികവിദ്യകള് എന്നിവയുടെ ദുരുപയോഗം വര്ധിച്ചുവരുന്ന സാഹചര്യത്തിലാണ് നീക്കം.
എഡിറ്റിംഗ് സോഫ്റ്റ്വെയര് ഉപയോഗപ്പെടുത്തി പൊതുജനങ്ങളെ തെറ്റിദ്ധരിപ്പിക്കാനോ, വ്യക്തികളെ ലക്ഷ്യം വയ്ക്കാനോ വ്യാജ ഓഡിയോ ക്ലിപ്പുകള് അല്ലെങ്കില് കൃത്രിമമായി നിര്മിച്ച ദൃശ്യ ഉള്ളടക്കം എളുപ്പത്തില് സൃഷ്ടിക്കാന് കഴിയും. സോഷ്യല് മീഡിയ പ്ലാറ്റ്ഫോമുകളില് തെറ്റായ വിവരണങ്ങള് കെട്ടിച്ചമയ്ക്കുന്നതും സ്വഭാവഹത്യ നടത്തുന്നതിനും, അല്ലെങ്കില് സ്വകാര്യത ലംഘിക്കുന്നതിനും ഡിജിറ്റല് ഉപകരണങ്ങള് ഉപയോഗിക്കുന്നത് ഉടനടി ക്രിമിനല് പ്രോസിക്യൂഷന് കാരണമാകുമെന്ന് ഒമാനി നിയമ അധികാരികള് മുന്നറിയിപ്പ് നല്കി.
പറയാത്ത കാര്യങ്ങള് പറഞ്ഞതായി അല്ലെങ്കില് ചെയ്യാത്ത പ്രവൃത്തികള് ചെയ്തതായി കാണിച്ചുള്ള ഇത്തരം പ്രചരണങ്ങള്ക്കെതിരെ ശക്തമായ നടപടിയുണ്ടാകും. ഡിജിറ്റല് ഉള്ളടക്കത്തില് ചെറിയ മാറ്റങ്ങള് വരുത്തുന്നതുപോലും ഒരാളെ തെറ്റായി ചിത്രീകരിക്കുന്ന തരത്തിലാണെങ്കില് അത് ഗുരുതരമായ സൈബര് കുറ്റകൃത്യമായി കണക്കാക്കപ്പെടുമെന്നും അധികൃതര് വ്യക്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
