റിയാദ്: യാത്രാ-വിനോദസഞ്ചാര സേവനങ്ങള്, ടൂറിസ്റ്റ് ഗൈഡുകള്, ഹോസ്പിറ്റാലിറ്റി സൗകര്യങ്ങള്, സ്വകാര്യ ഹോസ്പിറ്റാലിറ്റി യൂണിറ്റുകള് എന്നിവയില് ചട്ടങ്ങള് പരിഷ്കരിച്ച് സൗദി ടൂറിസം മന്ത്രാലയം. 'യാത്രാ-വിനോദസഞ്ചാര സേവന ചട്ടം' ലൈസന്സിങ് വിഭാഗങ്ങള് പരിഷ്കരിച്ചതോടെ സേവനങ്ങളുടെ വ്യാപ്തി വര്ധിച്ചു.
പുതിയ 'ടൂറിസ്റ്റ് ഗൈഡ് ചട്ട' പ്രകാരം ലൈസന്സിങ് വിഭാഗങ്ങള് ലളിതമാക്കിയിട്ടുണ്ട്. ഗൈഡുകള്ക്ക് ഒന്നിലധികം മേഖലകളിലും പ്രത്യേക വിഭാഗങ്ങളിലും പ്രവര്ത്തിക്കാന് സാധിക്കും. ലൈസന്സ് വിഭാഗത്തിനനുസരിച്ച് അംഗീകൃത പരിശീലന കോഴ്സുകളോ പരീക്ഷകളോ ഉള്പ്പെടെ, ലൈസന്സ് നല്കുന്നതിനും പുതുക്കുന്നതിനുമുള്ള വ്യവസ്ഥകളും പരിഷ്കരിച്ചു.
ടൂറിസ്റ്റ് ഗൈഡുകള്ക്ക് വിനോദസഞ്ചാരികളുമായി നേരിട്ട് കരാറിലേര്പ്പെടാനും ബുക്കിങ് രേഖകള് നല്കാനും അനുമതിയുണ്ടാകും. അതേസമയം വില, പണമടയ്ക്കല്, റദ്ദാക്കല്, പണം തിരികെ നല്കല് (റീഫണ്ട്) എന്നിവ സംബന്ധിച്ച നയങ്ങള് വ്യക്തമാക്കണം. ഹോസ്പിറ്റാലിറ്റി സൗകര്യങ്ങള്ക്കായുള്ള ചട്ടത്തിലെ മാറ്റങ്ങള് ലൈസന്സിങ്, വര്ഗ്ഗീകരണം, പ്രവര്ത്തന നടപടിക്രമങ്ങള് എന്നിവയ്ക്കൊപ്പം റിസര്വേഷന്, പണമടയ്ക്കല്, ഓണ്ലൈന് മാര്ക്കറ്റിങ് എന്നിവയെയും ഉള്ക്കൊള്ളുന്നു.
പരിഷ്കരിച്ച ചട്ടങ്ങള് സുരക്ഷാ വ്യവസ്ഥകള്, ജീവനക്കാരുടെ യോഗ്യത, ഇലക്ട്രോണിക് സംവിധാനങ്ങളുടെ സംയോജനം എന്നിവ ശക്തിപ്പെടുത്തുന്നു. ഒപ്പം, ഹോസ്പിറ്റാലിറ്റി സൗകര്യങ്ങള്ക്കായി പ്രത്യേക വിഭാഗങ്ങള് ഏര്പ്പെടുത്തുകയും, വര്ഗ്ഗീകരണ ലൈസന്സിങ്, പ്രവര്ത്തന നിലവാരം, സേവന മാനദണ്ഡങ്ങള് എന്നിവയുമായി കൂടുതല് അടുപ്പിക്കുകയും ചെയ്യുന്നു. സ്വകാര്യ ഹോസ്പിറ്റാലിറ്റി യൂണിറ്റുകളെ സംബന്ധിച്ചിടത്തോളം, നിയന്ത്രണ ചട്ടക്കൂട് 'പെര്മിറ്റുകളില്' നിന്ന് 'ലൈസന്സുകളിലേക്ക്' മാറ്റുകയും, അപേക്ഷാ വ്യവസ്ഥകളും യോഗ്യമായ വസ്തുവകകളുടെ മാനദണ്ഡങ്ങളും പരിഷ്കരിക്കുകയും ചെയ്തിട്ടുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
