ലഖ്നൗ: ആറുവരി പാതയില് പിന്നിലോട്ട് എടുത്ത കാറില് മറ്റൊരു വാഹനം ഇടിച്ച് ഒരു കുടുംബത്തിലെ നാല് പേര്ക്ക് ദാരുണാന്ത്യം. അപകടത്തില് മൂന്ന് പേര്ക്ക് പരിക്കേറ്റു. ഉത്തര് പ്രദേശിലെ സഹരണ്പൂരില് വെള്ളിയാഴ്ചയായിരുന്നു അപകടം. അപകടത്തിന്റെ ഞെട്ടിക്കുന്ന ദൃശ്യങ്ങള് സാമൂഹ്യമാധ്യമങ്ങളില് പുറത്തുവന്നിട്ടുണ്ട്.
ഡെറാഡൂണ്-പഞ്ച്കുല ആറുവരിപ്പാതയില് സഹാറന്പൂരിലെ റാംപൂര് മണിഹരണിലാണ് സംഭവം. ഹൈവേയില് കാര് പിന്നിലേക്ക് എടുക്കുന്നതിനിടെ പുറകില് നിന്നുവന്ന എസ്യുവി കാര് വന്നിടിക്കുകയായിരുന്നു. അപകടത്തെ തുടര്ന്ന് കാര് സമീപത്തുള്ള ഡിവൈഡറില് ഇടിച്ച് റോഡിന് കുറുകെ മറിഞ്ഞ് മറ്റൊരു ഡിവൈഡറില് ഇടിച്ചു. എസ്യുവി റോഡില് തലകീഴായി മറിയുകയും ചെയ്തു. ഹരിയാന സ്വദേശികളായ ചരണ് സിങ്, ഭാര്യ സുദേഷ്, മരുമകള് പ്രീതി, ചെറുമകന് ശിവാന്ഷ് എന്നിവരാണ് മരിച്ചത്. കാറിലുണ്ടായിരുന്ന മൂന്ന് പേര്ക്ക് ഗുരുതരമായി പരിക്കേല്ക്കുകയും ചെയ്തിട്ടുണ്ട്.
ഹരിയാനയിലെ സോണിപത് ജില്ലയിലെ ബഹാദൂര്ഗഢില് നിന്നുള്ളവരാണ് അപകടത്തില്പ്പെട്ടതെന്നും ഹരിദ്വാറിലേക്ക് യാത്രക്കിടെയായിരുന്നു സംഘമെന്നും പൊലീസ് പറഞ്ഞു. റാംപൂര് മണിഹരണ് പൊലീസ് സ്റ്റേഷന് പരിധിയിലുള്ള ഹല്ഗോയ ഗ്രാമത്തിന് സമീപം അപകടം. അപകടത്തില് അന്വേഷണം ആരംഭിച്ചതായും പൊലീസ് പറഞ്ഞു. അപകടമുണ്ടാക്കിയ രണ്ട് കാറുകളും പിടിച്ചെടുത്തു. ഡ്രൈവര്ക്കെതിരെ നിയമനടപടി സ്വീകരിച്ചതായും പൊലീസ് പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
