ഓരോ നിമിഷത്തിലും ഒരു ചിക്കൻ ബിരിയാണി; കോവിഡ് കാലത്തും ഇന്ത്യക്കാരുടെ പ്രിയം 

കോവിഡും തുടർന്നു വന്ന ലോക്ക്ഡൗണും കാര്യമായി ബാധിച്ച മേഖലയാണ് ഓൺലൈൻ ഫുഡ് ഡെലിവറി. പതിയെ പതിയെ ആളുകൾ സാധാരണ ജീവിതത്തിലേക്ക് മടങ്ങിയതോടെ ഈ മേഖല വലിയ മുന്നേറ്റമാണ് ഇപ്പോൾ നടത്തുന്നത്. ഇപ്പോഴിതാ 2020ലെ കണക്കെടുത്ത് പ്രമുഖ ഓൺലൈൻ ഭക്ഷ്യവിതരണക്കാരായ 'സ്വിഗി' രം​ഗത്തെത്തി. ഈ വർഷത്തെ ആകെ ഓർഡറുകളുടെ കണക്കെടുപ്പാണ് കമ്പനി ഇപ്പോൾ നടത്തിയിരിക്കുന്നത്. 

പോയ വർഷത്തിലേതിന് സമാനമായി ഇക്കുറിയും ഏറ്റവുമധികം ഓർഡർ ലഭിച്ചിരിക്കുന്നത് ചിക്കൻ ബിരിയാണിക്കാണെന്ന് സ്വി​ഗി വ്യക്തമാക്കുന്നു. ഓരോ സെക്കൻഡിലും ഒരു ബിരിയാണി എന്ന നിലയിൽ റെക്കോർഡ് ഓർഡറുകളെത്തിയെന്നാണ് ഇവർ വ്യക്തമാക്കുന്നത്. 

മിക്കവരും ആപ്പ് ഡൗൺലോഡ് ചെയ്ത ശേഷം ആദ്യം ഓർഡർ ചെയ്തത് തന്നെ ചിക്കൻ ബിരിയാണിയാണത്രേ. ഇന്ത്യക്കാർക്ക് ബിരിയാണിയോടുള്ള ഇഷ്ടം എത്രമാത്രമുണ്ടെന്ന് വെളിപ്പെടുത്തുന്നതാണ് ഈ റിപ്പോർട്ട്. 

ചിക്കൻ ബിരിയാണിക്ക് പിന്നാലെ മസാല ദോശ, പനീർ ബട്ടർ മസാല, ചിക്കൻ ഫ്രൈഡ് റൈസ്, മട്ടൺ ബിരിയാണി എന്നീ വിഭവങ്ങളും സ്ഥാനം പിടിച്ചു. മുൻകാലങ്ങളെ അപേക്ഷിച്ച് ചായയും കാപ്പിയും കൂടുതലായി ഓർഡർ ചെയ്യപ്പെട്ടതും ഈ വർഷമാണത്രേ. സ്‌നാക്‌സുകളുടെ വിഭാഗത്തിൽ 'പാനി പൂരി'യാണ് മുന്നിലെത്തിയിരിക്കുന്നത്. 

പലചരക്ക് സാധനങ്ങളുടെ വിൽപനയിലും വലിയ മെച്ചമാണുണ്ടായിട്ടുള്ളതെന്ന് 'സ്വിഗി' പറയുന്നു. സവാളയാണ് ആപ്പ് വഴി ഏറ്റവുമധികം പേർ ഓർഡർ ചെയ്തത്. ഇതിന് പിന്നാലെ നേന്ത്രപ്പഴം, പാൽ, ഉരുളക്കിഴങ്ങ്, മല്ലിയില തുടങ്ങിയവയും.