കനത്ത മഴയില്‍ കുതിച്ചുപാഞ്ഞ് ഓട്ടോറിക്ഷയെ ഇടിച്ചുതെറിപ്പിച്ച് ഓഡി കാര്‍ ; പമ്പരം പോലെ കറങ്ങി ഓട്ടോ ( വീഡിയോ)

ഹൈദരാബാദ് : കനത്ത മഴയില്‍ കുതിച്ചുപാഞ്ഞെത്തിയ ഓഡി കാര്‍ ഓട്ടോറിക്ഷയെ ഇടിച്ചു തെറിപ്പിച്ചു. അപകടത്തില്‍ ഒരാള്‍ മരിച്ചു. മധാപൂര്‍ ഏരിയയില്‍ ഇനോര്‍ബിറ്റ് മാളിന് സമീപം വെച്ചായിരുന്നു അപകടം. ഇതിന്റെ സിസിടിവി ദൃശ്യങ്ങള്‍ പുറത്തു വന്നു.

ഇടിയുടെ ആഘാതത്തില്‍ തെറിച്ചുപോയ ഓട്ടോ പമ്പരം പോലെ കറങ്ങി റോഡിലൂടെ പോകുന്നത് വീഡിയോയില്‍ കാണാം. കനത്ത മഴയെത്തുടര്‍ന്ന് നനഞ്ഞു കുതിര്‍ന്ന റോഡില്‍ അമിതവേഗതയില്‍ പിന്നിലൂടെയെത്തിയ കാറാണ് അപകടം ഉണ്ടാക്കിയത്. 

കാറില്‍ മൂന്നുപേരാണ് ഉണ്ടായിരുന്നത്. ഇവരെ പൊലീസ് അറസ്റ്റ് ചെയ്തു. ഒരു പാര്‍ട്ടിയില്‍ പങ്കെടുത്ത് മടങ്ങുകയായിരുന്നു ഇവരെന്ന് പൊലീസ് പറഞ്ഞു. അപകടം ഉണ്ടായശേഷം ഇവര്‍ നിര്‍ത്താതെ പോകുകയായിരുന്നുവെന്നും പൊലീസ് വ്യക്തമാക്കി.