സിജെപി നേതാവ് അശുതോഷ് രങ്ക കസ്റ്റഡിയിൽ; നിരാഹാര സമരവുമായി പ്രവർത്തകർ

ഗുവാഹത്തി: കോക്ക്റോച്ച് ജനതാ പാർട്ടി നേതാവ് അശുതോഷ് രങ്കയെയും 35 പ്രവർത്തകരെയും അസം പൊലീസ് കസ്റ്റഡിയിലെടുത്തു. ഗുവാഹത്തിയിൽ പാർട്ടിയുടെ പ്രത്യേക സമ്മേളനം ചേരാനിരിക്കെയാണ് നടപടി. രങ്കയെയും പ്രവർത്തകരെയും വസതിയിൽ നിന്നാണ് കസ്റ്റഡിയിലെടുത്തതെന്നാണ് റിപ്പോർട്ട്. രങ്കയ്ക്കൊപ്പം അങ്കിത് ഭരദ്വാജ്, പ്രേം ആകാശ് തുടങ്ങിയ നേതാക്കളും കസ്റ്റഡിയിൽ എടുത്തിട്ടുണ്ട്.

കസ്റ്റഡിയിലെടുത്തവർക്കെതിരെ ഏത് വകുപ്പാണ് ചുമത്തിയതെന്നോ എന്താണ് നടപടിക്ക് കാരണമെന്നോ പൊലീസ് വ്യക്തമാക്കിയിട്ടില്ല. സംഭവത്തിൽ പ്രതിഷേധിച്ച് കസ്റ്റഡിയിലുള്ള പ്രവർത്തകർ നിരാഹാര സമരം ആരംഭിച്ചതായും എല്ലാവരെയും വിട്ടയയ്ക്കുന്നതുവരെ സമരം തുടരുമെന്നും സി.ജെ.പി നേതാക്കൾ വ്യക്തമാക്കി.

അസമിലെ സർക്കാർ സ്കൂളുകളുടെ അടിസ്ഥാന സൗകര്യങ്ങൾ, അധ്യാപകരുടെ കുറവ്, തിരഞ്ഞെടുപ്പ് മണ്ഡലങ്ങളുടെ അതിർത്തി പുനർനിർണയം തുടങ്ങിയ വിഷയങ്ങൾ ചർച്ച ചെയ്യാനായിരുന്നു സി ജെ പി പ്രത്യേക സമ്മേളനം വിളിച്ചത്. ഈ സമ്മേളനം നടക്കാനിരിക്കെയാണ് പൊലീസിന്റെ നടപടി. അതേ സമയം, മുഖ്യമന്ത്രി ഹിമന്ത ബിശ്വ ശർമ കസ്റ്റഡിയെക്കുറിച്ചുള്ള ചോദ്യങ്ങളോട് പ്രതികരിച്ചില്ല. ആരോഗ്യ, വിദ്യാഭ്യാസ മേഖലകൾ മെച്ചപ്പെടുത്തുന്നതിനുള്ള നിർദേശങ്ങൾ ലഭിച്ചാൽ പരിഗണിക്കുമെന്നും അദ്ദേഹം പറഞ്ഞു.