ബെംഗളൂരു: ഗൗതം അദാനിക്കെതിരായ സാമ്പത്തിക ക്രമക്കേട് ആരോപണത്തില്‍ പ്രധാനമന്ത്രിയെ വിമര്‍ശിക്കുന്ന രാഹുല്‍ ഗാന്ധിക്ക് എതിരെ കേന്ദ്ര ധനകാര്യ മന്ത്രി നിര്‍മ്മല സീതാരാമാന്‍. പ്രധാനമന്ത്രി നരേന്ദ്ര മോദിക്കെതിരേ അടിസ്ഥാനമില്ലാത്ത ആരോപണങ്ങള്‍ ഉന്നയിച്ച് രാഹുല്‍ 'സ്ഥിരം നിയമലംഘകനാ'യി മാറിയിരിക്കുകയാണെന്ന് നിര്‍മല സീതാരാമന്‍ പറഞ്ഞു
'എല്ലാം അദാനിക്ക് നല്‍കി എന്ന് രാഹുല്‍ ഗാന്ധി വിചാരിക്കുന്നുണ്ടെങ്കില്‍ അത് തെറ്റാണ്, കേരളത്തില്‍ വിഴിഞ്ഞം തുറമുഖം അദാനിക്ക് നല്‍കിയത് കോണ്‍ഗ്രസ് സര്‍ക്കാരായിരുന്നു, ടെന്‍ഡര്‍ അടിസ്ഥാനത്തില്‍ അല്ല അത് നല്‍കിയത്. എന്നാല്‍ ഇപ്പോള്‍ കോണ്‍ഗ്രസല്ല, സിപിഎം സര്‍ക്കാരാണ് കേരളത്തില്‍. ആ ഉത്തരവ് റദ്ദാക്കാന്‍ ആവശ്യപ്പെടാത്തത് എന്തുകൊണ്ടാണെന്നും നിര്‍മല സീതാരാമന്‍ ചോദിച്ചു.
കോണ്‍ഗ്രസ് ഭരിക്കുന്ന രാജസ്ഥാനിലെ സോളാര്‍ പവര്‍ മുഴുവനും അദാനിക്കാണ് നല്‍കിയത്. ഛത്തീസ്ഖഡില്‍ അദാനിക്ക് നല്‍കാന്‍ ഇനി പദ്ധതികളൊന്നും ബാക്കിയില്ല. ആ ഉത്തരവുകളെല്ലാം റദ്ദ് ചെയ്യാന്‍ രാഹുല്‍ ഗാന്ധിയെ നിര്‍മല സീതാരാമന്‍ വെല്ലുവിളിച്ചു. കോണ്‍ഗ്രസ് ഭരിക്കുന്ന സംസ്ഥാനങ്ങളില്‍ രാഹുല്‍ ഗാന്ധി അതിനെതിരേ ഒരക്ഷരം സംസാരിക്കില്ലെന്നും അവര്‍ കൂട്ടിച്ചേര്‍ത്തു.
2019ലെ തിരഞ്ഞെടുപ്പിന് മുമ്പാണ് അദ്ദേഹം ഇത്തരത്തിലുള്ള ആരോപണങ്ങളുമായി രംഗത്തെത്തിയത്. ഇപ്പോള്‍ വീണ്ടും അദ്ദേഹം ആരോപണങ്ങളുമായെത്തിയിരിക്കുകയാണ്. പ്രധാനമന്ത്രിയ്‌ക്കെതിരാളിയായി ഉയരാന്‍ ശ്രമിക്കുന്ന അദ്ദേഹം തെറ്റായ കുറ്റാരോപണങ്ങളില്‍ നിന്ന് ഒന്നും പഠിക്കുന്നില്ല'-ധനമന്ത്രി പറഞ്ഞു.
റഫാല്‍ കരാറുമായി ബന്ധപ്പെട്ട ആരോപണങ്ങളില്‍ രാഹുല്‍ ഗാന്ധി മാപ്പു പറഞ്ഞതിനെ നിര്‍മല സീതാരാമന്‍ ഓര്‍മ്മപ്പെടുത്തുകയും ചെയ്തു. ഞാന്‍ സവര്‍ക്കറല്ല ഗാന്ധി എന്നാണ് അദ്ദേഹം പറഞ്ഞത്. എന്നാല്‍ നേരത്തെ രണ്ടുതവണ മാപ്പ് പറഞ്ഞത് അദ്ദേഹം ഓര്‍ക്കുന്നില്ലേയെന്നും അവര്‍ ചോദിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
