ഫോം 6, 7, 8 മാറ്റാൻ തെരഞ്ഞെടുപ്പ് കമ്മീഷന് അധികാരമില്ല; നിലവിലുള്ളവരെ എന്തിന് ബുദ്ധിമുട്ടിക്കുന്നുവെന്ന് സുപ്രീം കോടതി

ന്യൂഡൽഹി: വോട്ടർ പട്ടികയിൽ പേര് ചേർക്കുന്നതിനും മാറ്റങ്ങൾ വരുത്തുന്നതിനുമുള്ള നിർദ്ദിഷ്ട ഫോമുകളിൽ (ഫോം 6, 7, 8) സ്വന്തം നിലയ്ക്ക് മാറ്റം വരുത്താൻ തെരഞ്ഞെടുപ്പ് കമ്മീഷന് യാതൊരുവിധ അധികാരവുമില്ലെന്ന് സുപ്രീം കോടതി. ഡൽഹിയിലെ വോട്ടർ പട്ടിക സമഗ്രമായി പുതുക്കുന്നതുമായി ബന്ധപ്പെട്ട ഹർജികൾ പരിഗണിക്കവെയാണ് സുപ്രീം കോടതിയുടെ സുപ്രധാന ഇടപെടൽ. നേരത്തെ തന്നെ വോട്ടർ പട്ടികയിൽ പേരുള്ളവരെ വീണ്ടും പട്ടികയിൽ ഉൾപ്പെടുത്താനായി എന്തിനാണ് പുതിയ വോട്ടർമാർക്കുള്ള ഫോം 6 പൂരിപ്പിച്ച് നൽകാൻ ആവശ്യപ്പെടുന്നതെന്ന് കോടതി ചോദിച്ചു.

ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ മൂന്നംഗ ബെഞ്ചാണ് ഹർജികൾ പരിഗണിച്ചത്. ഫോം 6, 7, 8 എന്നിവ നിയമപ്രകാരം നിശ്ചയിച്ചിട്ടുള്ള നിർദ്ദിഷ്ട മാതൃകകളാണെന്നും അവയിൽ യാതൊരുവിധ തിരുത്തലുകളും മാറ്റങ്ങളും വരുത്താൻ കമ്മീഷന് സാധിക്കില്ലെന്നും കോടതി ചൂണ്ടിക്കാട്ടി. ഡൽഹിയിൽ അടുത്ത കാലത്തൊന്നും തെരഞ്ഞെടുപ്പുകൾ നടക്കാനിരിക്കാത്ത സാഹചര്യത്തിൽ എന്തിനാണ് അപേക്ഷകൾ സമർപ്പിക്കാൻ ഒക്ടോബർ 30 എന്ന അവസാന തീയതി കമ്മീഷൻ തിടുക്കപ്പെട്ട് നിശ്ചയിച്ചതെന്നും കോടതി ചോദിച്ചു. പട്ടികയിൽ പേര് പുനഃസ്ഥാപിക്കുന്നതിന് കർശനമായ ഒരു സമയപരിധി നിശ്ചയിക്കരുതെന്ന് കമ്മീഷനോട് നിർദ്ദേശിച്ച ബെഞ്ച്, വിവിധ കാരണങ്ങളാൽ വിവരശേഖരണ ഫോമുകൾ നൽകാൻ കഴിയാതെ പോയ വോട്ടർമാർക്കായി ലളിതമായ ഒരു ബദൽ പരിഹാരം കണ്ടെത്താൻ കമ്മീഷനോട് ആവശ്യപ്പെട്ടു. മുമ്പ് വോട്ടർ പട്ടികയിൽ ഉണ്ടായിരുന്ന ഒരാളുടെ പേര് പിന്നീട് ഒഴിവാക്കപ്പെട്ടിട്ടുണ്ടെങ്കിൽ, ആ വ്യക്തിയുടെ പ്രത്യേക സാഹചര്യം പരിഗണിച്ചുള്ള പോംവഴിയാണ് കാണേണ്ടത്. അല്ലാതെ അവരെ പുതിയ വോട്ടർമാരുടെ പട്ടികയിൽ പെടുത്തി ബുദ്ധിമുട്ടിക്കുകയല്ല വേണ്ടതെന്നും കോടതി ചൂണ്ടിക്കാട്ടി.

ഹർജിക്കാർക്ക് വേണ്ടി ഹാജരായ മുതിർന്ന അഭിഭാഷകൻ പ്രശാന്ത് ഭൂഷൺ കമ്മീഷന്റെ നടപടികളിലെ പൊരുത്തക്കേടുകൾ അക്കമിട്ട് നിരത്തി. നിരവധി വോട്ടർമാർക്ക് വിവരശേഖരണ ഫോമുകൾ ലഭിച്ചിട്ടില്ലെന്നും പലർക്കും യഥാസമയം അവ സമർപ്പിക്കാൻ സാധിച്ചില്ലെന്നും അദ്ദേഹം വാദിച്ചു. ഡൽഹിയുടെ ഒരു ഭാഗത്തുനിന്ന് മറ്റൊരു ഭാഗത്തേക്ക് താമസം മാറിയ നിരവധി ആളുകൾ ഇതിൽ ഉൾപ്പെടുന്നുണ്ട്. മേൽവിലാസത്തിൽ മാറ്റം വരുത്താനാണ് ഫോം 8 ഉപയോഗിക്കുന്നത്. എന്നാൽ പുതിയ വോട്ടർമാരെ ചേർക്കാനാണ് ഫോം 6 നിശ്ചയിച്ചിട്ടുള്ളത്. അതുകൊണ്ടുതന്നെ, തങ്ങൾ ഇതിനുമുമ്പ് ഒരു വോട്ടർ പട്ടികയിലും ഉൾപ്പെട്ടിട്ടില്ലെന്ന് സത്യപ്രസ്താവന നൽകാൻ നിലവിലുള്ള വോട്ടർമാരെ ഫോം 6 വഴി നിർബന്ധിക്കുന്നത് തീർത്തും അന്യായവും യുക്തിരഹിതവുമാണെന്ന് പ്രശാന്ത് ഭൂഷൺ ബോധിപ്പിച്ചു.

വോട്ടർമാർ ഓഫീസുകളിൽ വന്ന് അപേക്ഷ നൽകുന്നത് കാത്തിരിക്കുകയല്ല തെരഞ്ഞെടുപ്പ് കമ്മീഷൻ ചെയ്യേണ്ടതെന്നും, മറിച്ച് വോട്ടർമാരിലേക്ക് നേരിട്ട് എത്തിച്ചേരാനുള്ള നടപടികളാണ് സ്വീകരിക്കേണ്ടതെന്നും ചീഫ് ജസ്റ്റിസ് ഓർമ്മിപ്പിച്ചു. ഫോം 6, ഫോം 8 എന്നിവ വഴിയുള്ള അപേക്ഷകൾ സ്വീകരിക്കുന്നത് തുടരണമെന്നും, സാധാരണക്കാർക്ക് ബുദ്ധിമുട്ടില്ലാത്ത ഏറ്റവും ലളിതമായ വഴി സ്വീകരിക്കണമെന്നും കോടതി കമ്മീഷനോട് ആവശ്യപ്പെട്ടു. കോടതിയുടെ നിരീക്ഷണങ്ങളെത്തുടർന്ന് അപേക്ഷകൾ സമർപ്പിക്കാനുള്ള അവസാന തീയതി നീട്ടിനൽകാൻ തയ്യാറാണെന്ന് തെരഞ്ഞെടുപ്പ് കമ്മീഷൻ അറിയിച്ചു.