ന്യൂഡല്ഹി: ഹൈക്കോടതികള്ക്ക് സുപ്രധാന മാര്ഗനിര്ദേശവുമായി സുപ്രീംകോടതി. കേസുകളില് വാദം കേള്ക്കല് പൂര്ത്തിയായാല് മൂന്നു മാസത്തിനകം വിധി പ്രസ്താവിക്കണം. വ്യക്തി സ്വാതന്ത്ര്യവുമായി ബന്ധപ്പെട്ട കേസുകളില് അതിനും മുമ്പു തന്നെ വിധി പ്രസ്താവിക്കേണ്ടതാണ്. ജാമ്യ ഹര്ജികളില് വാദം കേള്ക്കുന്ന ദിവസമോ തൊട്ടടുത്ത ദിവസമോ വിധി പ്രസ്താവിക്കണമെന്നും സുപ്രീംകോടതി നിര്ദേശിച്ചിട്ടുണ്ട്.
രാജ്യത്തെ കോടതികളില് വാദം കേള്ക്കല് പൂര്ത്തിയായിട്ടും വിധി പ്രസ്താവം അനന്തമായി നീണ്ടുപോകുന്നു എന്ന ആക്ഷേപം നിലനിന്നിരുന്നു. ചില ജഡ്ജിമാര് വിരമിക്കുന്നതിന് തൊട്ടു മുമ്പാണ് കേസുകള് വിധി പ്രസ്താവം നടത്തിയിരുന്നത്. ഈ പശ്ചാത്തലത്തിലാണ് ചീഫ് ജസ്റ്റിസ് സൂര്യകാന്തിന്റെ അധ്യക്ഷതയിലുള്ള മൂന്നംഗ ബെഞ്ച് സുപ്രധാന മാര്ഗനിര്ദേശം പുറപ്പെടുവിച്ചത്.
വാദം കേള്ക്കല് പൂര്ത്തിയാക്കിയ കേസുകളില് മൂന്നു മാസത്തിനുള്ളില് വിധി പുറപ്പെടുവിക്കണം. വിധി പ്രസ്താവം നീണ്ടുപോയാല് അക്കാര്യം ഹൈക്കോടതി രജിസ്ട്രാര് ജനറല് ഹൈക്കോടതി ചീഫ് ജസ്റ്റിസിന്റെ ശ്രദ്ധയില്പ്പെടുത്തേണ്ടതാണ്. ചീഫ് ജസ്റ്റിസിന് വാദം കേട്ട ബെഞ്ചിനോട് രണ്ടാഴ്ചയ്ക്കകം വിധി പ്രസ്താവിക്കാന് നിര്ദേശിക്കാം. അതുണ്ടായില്ലെങ്കില് മറ്റൊരു ബെഞ്ചിലേക്ക് ഈ കേസ് ലിസ്റ്റ് ചെയ്യാവുന്നതാണെന്ന് സുപ്രീംകോടതി വ്യക്തമാക്കി.
വ്യക്തി സ്വാതന്ത്ര്യവുമായി ബന്ധപ്പെട്ട കേസുകളില് ഏറ്റവും കുറഞ്ഞ സമയപരിധിക്കുള്ളില് വിധി പറയണം. ജാമ്യ ഹര്ജികളില് വാദം കേള്ക്കുന്ന ദിവസമോ, തൊട്ടടുത്ത ദിവസമോ വിധി പറയണം. അങ്ങനെ ജാമ്യം അനുവദിക്കുന്ന പക്ഷം, അതേ ദിവസം തന്നെ ജയില് അധികൃതരെ അറിയിക്കണം. വിചാരണ തടവുകാരാണെങ്കില് ഒട്ടും വൈകാതെ തന്നെ അവരുടെ മോചനം ഉറപ്പാക്കണമെന്നും സുപ്രീംകോടതി മാര്ഗനിര്ദേശത്തില് പറയുന്നു.
വാദം കേള്ക്കല് പൂര്ത്തിയായി നാലു മാസത്തിനുശേഷവും വിധി പ്രസ്താവിച്ചിട്ടില്ലെങ്കില്, ബന്ധപ്പെട്ട കക്ഷികള്ക്ക് കേസ് മറ്റൊരു ബെഞ്ചിലേക്ക് മാറ്റാന് ചീപ് ജസ്റ്റിസിനോട് ആവശ്യപ്പെടാവുന്നതാണ്. ഓപ്പണ് കോടതികള് പുറപ്പെടുവിക്കുന്ന വിധി 24 മണിക്കൂറിനുള്ളില് വെബ്സൈറ്റില് പ്രസിദ്ധീകരിക്കണമെന്നും സുപ്രീംകോടതി നിര്ദേശിച്ചിട്ടുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
