ബസിന് പിന്നിലേക്ക് ഇടിച്ചുകയറി ട്രക്ക്; റോഡരികില്‍ ഉറങ്ങുകയായിരുന്ന 18 തൊഴിലാളികള്‍ക്ക് ദാരുണാന്ത്യം

ലഖ്‌നൗ: നിർത്തിയിട്ട ബസിലേക്ക് ട്രക്ക് പാഞ്ഞുകയറി ഉണ്ടായ അപകടത്തിൽ 18 മരണം. ഉത്തർപ്രദേശിലെ ബരാബങ്കിയിലാണ് ദാരുണാപകടം. റോഡരികിൽ നിർത്തിയിട്ട ബസിന് മുന്നിൽ കിടന്നുറങ്ങിയ 18 തൊഴിലാളികളാണ് മരിച്ചത്. 

ബുധനാഴ്ച പുലർച്ചെയാണ് അപകടം. ഹരിയാനയിൽ നിന്ന് മടങ്ങുകയായിരുന്ന ബിഹാർ സ്വദേശികളാണ് അപകടത്തിൽ മരിച്ചത്. ഇവർ യാത്ര ചെയ്ത ബസ് ബ്രേക്ക് ഡൗണായതിനെ തുടർന്ന് ഹൈവേക്ക് സമീപം കിടന്നുറങ്ങുകയായിരുന്നു.

നിർത്തിയിട്ട ബസിന് പിന്നിൽ അമിതവേഗതയിലെത്തിയ ട്രക്ക് ഇടിച്ചതോടെ അതിശക്തിയിൽ മുന്നോട്ടു നീങ്ങിയ ബസ് കയറി 18 പേരും തൽക്ഷണം മരിച്ചു. പരിക്കേറ്റവരെ സമീപത്തെ ആശുപത്രിയിൽ പ്രവേശിപ്പിച്ചു. ‌