മുഖ്യമന്ത്രി വിജയ്‌യുടെ എല്ലൊടിക്കുമെന്ന് ഭീഷണി: ഡിഎംകെ എംഎൽഎ അറസ്റ്റിൽ

തൂത്തുക്കുടി: തമിഴ്‌നാട് മുഖ്യമന്ത്രിയും തമിഴക വെട്രി കഴകം അധ്യക്ഷനുമായ ജോസഫ് വിജയ്‌ക്കെതിരെ വധഭീഷണിയും വിദ്വേഷ പ്രസംഗവും നടത്തിയ കേസിൽ ഡിഎംകെ എംഎൽഎ ജി.വി. മാർക്കണ്ഡേയനെ തൂത്തുക്കുടി ജില്ലാ ക്രൈംബ്രാഞ്ച് അറസ്റ്റ് ചെയ്തു. വിളാത്തികുളം മണ്ഡലത്തിൽ നിന്നുള്ള എംഎൽഎയാണ് മാർക്കണ്ഡേയൻ.

ശനിയാഴ്ച വൈകീട്ട് കോവിൽപട്ടിയിൽ നടന്ന നന്ദിപ്രകാശ യോഗത്തിനിടെയായിരുന്നു കേസിനാസ്പദമായ സംഭവം. തമിഴ്‌നാട് നിയമസഭയിൽ വെച്ച് മുഖ്യമന്ത്രി വിജയ്‌യുടെ എല്ലുകൾ തല്ലിയൊടിക്കുമെന്ന് ഭീഷണിപ്പെടുത്തുകയും, മുഖ്യമന്ത്രിക്കെതിരെ അധിക്ഷേപകരമായ പരാമർശങ്ങൾ നടത്തുകയും ചെയ്തെന്നാണ് എംഎൽഎയ്ക്കെതിരെയുള്ള ആരോപണം.

എംഎൽഎയുടെ പ്രസംഗത്തിനെതിരെ തമിഴക വെട്രി കഴകം നോർത്ത് ഈസ്റ്റ് ജില്ലാ ജോയിന്റ് സെക്രട്ടറി പി. കാശിരാമൻ തൂത്തുക്കുടി എസ്പി അഭിഷേക് ഗുപ്തയ്ക്ക് പരാതി നൽകുകയായിരുന്നു. പരാതി അന്വേഷിച്ച ജില്ലാ ക്രൈംബ്രാഞ്ച്, മാർക്കണ്ഡേയനെതിരെ ഭാരതീയ ന്യായ സംഹിതയിലെ (BNS) 351(3), 352, 353(2) എന്നീ വകുപ്പുകൾ പ്രകാരം കേസ് എടുത്തു. തുടർന്ന് തിങ്കളാഴ്ച അതിരാവിലെ ഡിസിബി ഇൻസ്പെക്ടർ പി. ജാനകിയുടെ നേതൃത്വത്തിലുള്ള പൊലീസ് സംഘം എംഎൽഎയുടെ വീട്ടിലെത്തി അറസ്റ്റ് ചെയ്യുകയായിരുന്നു. വിവരം അറിഞ്ഞ് ഡിഎംകെ പ്രവർത്തകർ വീടിന് മുന്നിൽ തടിച്ചുകൂടുകയും പൊലീസിനെ തടഞ്ഞ് പ്രതിഷേധിക്കുകയും ചെയ്തു. കനത്ത പൊലീസ് സന്നാഹത്തോടെ എംഎൽഎയെ കസ്റ്റഡിയിലെടുത്ത സംഘം കൂടുതൽ ചോദ്യം ചെയ്യലിനായി തൂത്തുക്കുടി എസ്പി ഓഫീസിലേക്ക് മാറ്റി. നിലവിൽ അവിടെ ചോദ്യം ചെയ്യൽ പുരോഗമിക്കുകയാണ്