പൂനെയില്‍ ഗവേഷക വിദ്യാര്‍ത്ഥിനി ജീവനൊടുക്കി; പീഡനാരോപണത്തെത്തുടര്‍ന്ന് ഗൈഡ് അറസ്റ്റില്‍

പൂനെ: പിഎച്ച്ഡി വിദ്യാര്‍ഥിയായ മുപ്പതുകാരി പൂനെയിലെ വസതിയില്‍ ജീവനൊടുക്കിയ നിലയില്‍. ഗവേഷണ ഗൈഡിന്റെ പീഡനത്തെത്തുടര്‍ന്നാണ് യുവതി ജീവനൊടുക്കിയതെന്ന് പൊലീസ് അറിയിച്ചു. ബൊട്ടാണിക്കല്‍ സര്‍വേ ഓഫ് ഇന്ത്യയുടെ കൊറേഗാവ് പാര്‍ക്ക് ഓഫീസിലെ അസിസ്റ്റന്റ് ഡയറക്ടറായ പ്രതിയെ പൊലീസ് അറസ്റ്റ് ചെയ്തു.

ശനിയാഴ്ച ചിഞ്ച്വാഡ് മേഖലയിലെ വീട്ടിലാണ് യുവതിയെ തൂങ്ങിമരിച്ച നിലയില്‍ കണ്ടെത്തിയത്. ഗൈഡിന്റെ മോശം പെരുമാറ്റത്തെയും പീഡനത്തെയും കുറിച്ച് പരാമര്‍ശിക്കുന്ന ആത്മഹത്യാക്കുറിപ്പ് പൊലീസ് കണ്ടെടുത്തിട്ടുണ്ട്.

ബോട്ടണിയില്‍ ബിരുദാനന്തര ബിരുദം പൂര്‍ത്തിയാക്കിയ യുവതി 2025 ഓഗസ്റ്റ് മുതല്‍ പ്രതിയുടെ കീഴില്‍ ഗവേഷണം നടത്തിവരികയായിരുന്നുവെന്ന് ഭോസാരി എംഐഡിസി പൊലീസ് സ്റ്റേഷനിലെ ഉദ്യോഗസ്ഥര്‍ പറഞ്ഞു. പ്രതിക്കെതിരെ ആത്മഹത്യാ പ്രേരണാക്കുറ്റം ചുമത്തി കേസെടുത്തതായും പൊലീസ് വ്യക്തമാക്കി.