ബംഗളുരു: അസഹിഷ്ണുതയും വിദ്വേഷ പ്രസംഗവും നടത്തുന്ന കേന്ദ്രമന്ത്രി അനന്ത്കുമാര്‍ ഹെഗ്‌ഡെയേക്കാള്‍ താന്‍ എന്തുകൊണ്ടും ഇന്ത്യാക്കാരിയാണെന്ന് തബാസും റാവു. കര്‍ണാടക കോണ്‍ഗ്രസ് നേതാവ് ദിനേഷ് ഗുണ്ടുറാവുവിന്റെ ഭാര്യയാണ് തബാസും. മറ്റ് മതങ്ങളെ താന്‍ ബഹുമാനിക്കാറുണ്ടെന്നും ബിജെപി നേതാക്കളെ പോലെയല്ലെന്നും അവര്‍ കൂട്ടിച്ചേര്‍ത്തു.
മുതിര്‍ന്ന കോണ്‍ഗ്രസ് നേതാവായ ദിനേഷ് ഗുണ്ടുറാവു ഒരു മുസ്ലിം സ്ത്രീയുടെ പിന്നാലെയാണെന്നായിരുന്നു മിശ്ര വിവാഹിതരായ ഇവരെ പരിഹസിച്ച് കേന്ദ്രമന്ത്രി പ്രസംഗിച്ചത്. അനാവശ്യ വിവാദങ്ങളിലേക്ക് തന്നെ വലിച്ചിഴയ്ക്കുന്നത് കുടുംബാംഗങ്ങള്‍ക്ക് ബുദ്ധിമുട്ടുണ്ടാക്കുന്നുവെന്നും ഇത് മൂന്നാം പ്രാവശ്യമാണ് തനിക്കെതിരെ അധിക്ഷേപങ്ങള്‍ ഉണ്ടാവുന്നതെന്നും അവര്‍ പറഞ്ഞു.
ട്വിറ്ററില്‍ തന്നെ കേന്ദ്രമന്ത്രിക്ക് മറുപടി നല്‍കാന്‍ ശ്രമിച്ചുവെങ്കിലും അദ്ദേഹം ബ്ലോക്ക്‌ചെയ്തതായും തബാസും പറഞ്ഞു. തരംതാണ ഭാഷയുപയോഗിച്ചു കൊണ്ടുള്ള ബിജെപി നേതാക്കളുടെ വാക്കുകള്‍ ലജ്ജാകരമാണെന്നും സ്വകാര്യതകളെ ബഹുമാനിക്കാന്‍ ബിജെപി നേതാക്കള്‍ക്ക് കഴിയാത്തതില്‍ നിരാശയുണ്ടെന്നും അവര്‍ പറഞ്ഞു. 25 വര്‍ഷം മുന്‍പാണ് മുസ്ലിമായ തബാസും കോണ്‍ഗ്രസ് നേതാവായ ദിനേഷ് ഗുണ്ടുറാവുവിനെ വിവാഹം കഴിച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
