ന്യൂഡല്‍ഹി: തെരഞ്ഞെടുപ്പ് ലക്ഷ്യമിട്ട് രാജ്യതലസ്ഥാനമായ ഡല്‍ഹിയില്‍ ബിജെപി 1731 പാര്‍ട്ടി ഓഫീസുകള്‍ തുറക്കണമെന്ന് പാര്‍ട്ടി ദേശീയ അധ്യക്ഷനും കേന്ദ്ര ആഭ്യന്തരമന്ത്രിയുമായ അമിത് ഷാ. നിയമസഭ തെരഞ്ഞടുപ്പിന് മുന്‍പായി മുഴുവന്‍ ജനവാസകേന്ദ്രങ്ങളിലും ഓഫീസുകള്‍ തുറക്കണമെന്നാണ്‌ അമിത് ഷായുടെ നിര്‍ദേശം.
ഇത് സംബന്ധിച്ച ദേശീയ നേതൃത്വത്തിന്റെ നിര്‍ദ്ദേശം ലഭിച്ചതായി ഡല്‍ഹി ബിജെപി സംസ്ഥാന ജനറല്‍ സെക്രട്ടറി സിദ്ധാര്‍ത്ഥന്‍ പറഞ്ഞു. രണ്ട് ദിവസത്തിനകം നിര്‍മ്മാണത്തിനായുള്ള ഒരുക്കങ്ങള്‍ ആരംഭിക്കുമെന്നും അദ്ദേഹം പറഞ്ഞു. പ്രധാനമായും ഡല്‍ഹിയിലെ ചേരി പ്രദേശങ്ങളിലാകും പാര്‍ട്ടി ഓഫീസുകള്‍ പ്രവര്‍ത്തിക്കുക.
ഡല്‍ഹിയിലെ അനധികൃത കോളനികളില്‍ 4 താമസിക്കുന്ന 40 ലക്ഷത്തോളം പേര്‍ക്ക് ഭൂമിയുടെ ഉടമസ്ഥാവകാശം നല്‍കാന്‍ കേന്ദ്രസര്‍ക്കാര്‍ തീരുമാനിച്ചിരുന്നു. പ്രധാനമന്ത്രി നരേന്ദ്ര മോദിയുടെ അദ്ധ്യക്ഷതയില്‍ ചേര്‍ന്ന കേന്ദ്ര മന്ത്രിസഭാ യോഗമാണ് സുപ്രധാന തീരുമാനമെടുത്തത്. 1797 അനധികൃത കോളനികളില്‍ താമസിക്കുന്നവര്‍ക്ക് ഇതിന്റെ ഗുണം ലഭിക്കുമെന്നാണ് റിപ്പോര്‍ട്ടുകള്‍. ബിജെപിയുടെ ഈ നീക്കത്തെ മുഖ്യമന്ത്രി അരവിന്ദ് കെജ് രിവാള്‍ സ്വാഗതം ചെയ്തിരുന്നു.
ഡല്‍ഹിയില്‍ ആളുകളുടെ പുനരധിവാസവുമായി ബന്ധപ്പെട്ട് ജനങ്ങളില്‍ നിന്ന് അധികൃതര്‍ വലിയ തുക ഈടാക്കാന്‍ സാധ്യതയുണ്ടെന്നാണ് ബിജെപിക്കാര്‍ പറയുന്നത്. ഈ സാഹചര്യത്തില്‍ ഓഫീസ് തുറന്നാല്‍ അത് ചേരിയിലെ ജനങ്ങള്‍ക്ക് സഹായകമാകുമെന്നാണ് കണക്ക് കൂട്ടല്‍. ഇതിലൂടെ നിയമസഭാ തെരഞ്ഞടുപ്പില്‍ അധികാരം പിടിക്കാനാവുമെന്നും ബിജെപി പ്രതീക്ഷിക്കുന്നു. ചിലയിടങ്ങളില്‍ പ്രവര്‍ത്തകരുടെ വീടുകള്‍ ഓഫീസായി പ്രവര്‍ത്തിപ്പിക്കാനും പാര്‍ട്ടി ആലോചിക്കുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
