ന്യൂഡല്‍ഹി: ഉത്തര്‍പ്രദേശിലേയും ഡല്‍ഹിയിലേയും കോവിഡ് ബാധിത മേഖലകളല്ലാത്ത പ്രദേശങ്ങളിലെ മദ്യ വില്‍പ്പനശാലകള്‍ നാളെ മുതല്‍ തുറന്നു പ്രവര്‍ത്തിക്കും. രാവിലെ പത്ത് മുതല്‍ വൈകിട്ട് ഏഴ് മണി വരെയാണ് യുപിയില്‍ ഷോപ്പുകള്‍ തുറന്നു പ്രവര്‍ത്തിക്കുക.
തലസ്ഥാനത്ത് 400ല്‍ അധികം മദ്യ വില്പന ശാലകള്‍ തുറന്ന് പ്രവര്‍ത്തിക്കാനാണ് അനുമതി. രാജ്യത്തെ മദ്യവില്പനശാലകള്‍ നിയന്ത്രണങ്ങള്‍ക്ക് വിധേയമായി പ്രവര്‍ത്തിക്കാമെന്ന് ലോക്ക്ഡൗണ്‍ ഇളവുകള്‍ പ്രഖ്യാപിച്ചതിനിടെ കേന്ദ്രം വ്യക്തമാക്കിയിരുന്നു. ഇതിന് പിന്നാലെയാണ് ഇരു സംസ്ഥാനങ്ങളും തീരുമാനം പ്രഖ്യാപിച്ചത്.
ഡല്‍ഹിയില്‍ മാളുകളിലടക്കം 545 മദ്യഷാപ്പുകള്‍ ഉണ്ടെന്നാണ് ഡല്‍ഹി എക്‌സൈസ് വകുപ്പ് വ്യക്തമാക്കുന്നത്. ഇവ ലോക്ക്ഡൗണ്‍ പ്രഖ്യാപിച്ച മാര്‍ച്ച് 22 മുതല്‍ അടഞ്ഞുകിടക്കുകയാണ്.
കേന്ദ്രത്തിന്റെ ലോക്ക്ഡൗണ്‍ ഇളവുകളുടെ പ്രഖ്യാപനത്തിന് പിന്നാലെ ഡല്‍ഹി സര്‍ക്കാര്‍ കൊറോണ ബാധിത മേഖലകള്‍ അല്ലാത്ത സ്ഥലങ്ങളില്‍ പ്രവര്‍ത്തിക്കുന്ന മദ്യവില്പനശാലകളുടെ കണക്കെടുപ്പ് നടത്തിയിരുന്നു. കൂടാതെ ആഭ്യന്തര മന്ത്രാലയത്തിന്റെ നിര്‍ദ്ദേശമനുസരിച്ച് എല്‍6, എല്‍8 വിഭാഗങ്ങളില്‍പ്പെട്ട മദ്യ വില്‍പ്പനശാലകളുടെ കണക്കെടുപ്പ് ഡല്‍ഹി എക്‌സൈസ് വകുപ്പും നടത്തിയിരുന്നു.
രാജ്യത്ത് മെയ് നാല് മുതല്‍ മൂന്നാംഘട്ട ലോക്ക്ഡൗണ്‍ പ്രഖ്യാപനത്തിനിടെയാണ് ഗ്രീന്‍, ഓറഞ്ച് മേഖലകളിലും റെഡ്‌സോണിലെ ഹോട്ട് സ്‌പോട്ടുമല്ലാത്ത പ്രദേശങ്ങളിലെ മദ്യ വില്പനശാലകള്‍ തുറക്കുന്നതിന് കേന്ദ്രം അനുമതി നല്‍കിയത്. അതേസമയം ഡല്‍ഹിയിലെ 11 ജില്ലകളും റെഡ്‌സോണുകളുടെ പട്ടികയിലാണ്. കൂടാതെ 96 പ്രദേശങ്ങളില്‍ കര്‍ശന നിയന്ത്രണം ഏര്‍പ്പെടുത്തിയിട്ടുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
