പൊതുപരിപാടിക്കിടെ കേന്ദ്രമന്ത്രിയുടെ മുഖത്ത് അടിക്കാന് ശ്രമം; യുവാവ് അറസ്റ്റില്
മുംബൈ; പൊതുപരിപാടിക്കിടെ കേന്ദ്രമന്ത്രിയെ മര്ദിക്കാന് ശ്രമിച്ച യുവാവിനെ പൊലീസ് അറസ്റ്റ് ചെയ്തു. കേന്ദ്ര സാമൂഹ്യനീതി വകുപ്പുമന്ത്രിയും ആര്പിഐ(എ) പാര്ട്ടി അധ്യക്ഷനുമായ രാംദാസ് അത്താവ്ലെയ്ക്കു നേരെയാണ് അക്രമണശ്രമമുണ്ടായത്. മുംബൈയിലാണ് സംഭവമുണ്ടായത്. പരിപാടി കഴിഞ്ഞ് ഇറങ്ങുന്നതിനിടെ മുഖത്ത് അടിക്കാന് ശ്രമിക്കുകയായിരുന്നു. സംഭവത്തില് പ്രവീണ് ഗോസാവി എന്നയാളെ പൊലീസ് അറസ്റ്റ് ചെയ്തു.
ശനിയാഴ്ച ഭരണഘടനാദിനാചരണവുമായി ബന്ധപ്പെട്ട് അംബര്നാഥില് നടന്ന പരിപാടിക്കിടെയായിരുന്നു സംഭവം. അത്താവ്ലെ വേദിയില് നിന്ന് ഇറങ്ങുമ്പോള് പ്രവീണ് ആള്ക്കൂട്ടത്തില് നിന്ന് പാഞ്ഞടുത്ത് മര്ദിക്കാന് ശ്രമിക്കുകയായിരുന്നു. മന്ത്രിയുടെ കൂടെയുണ്ടായിരുന്നവര് ഇയാളെ തടഞ്ഞു. പിന്നീട് അര്പിഐ പ്രവര്ത്തകര് പ്രവീണിനെ ക്രൂരമായി മര്ദിക്കുകയും പൊലീസില് ഏല്പ്പിക്കുകയുമായിരുന്നു.
പ്രവീണിനെ മര്ദിക്കുന്നതിന്റെ ദൃശ്യങ്ങളും പുറത്തുവന്നിട്ടുണ്ട്. സാരമായി പരുക്കേറ്റ ഇയാളെ ആശുപത്രിയില് പ്രവേശിപ്പിച്ചിരിക്കുകയാണ്. സമുദായത്തിന്റെ പേര് വ്യക്തിലാഭത്തിനു വേണ്ടി അത്താവ്ലെ ഉപയോഗിക്കുന്നതില് പ്രകോപിതനായാണ് ആക്രമണത്തിനു മുതിര്ന്നതെന്ന് പ്രവീണ് പറഞ്ഞതായാണ് റിപ്പോര്ട്ടുകള്. പ്രവീണ് അംബ്ദേര് അനുയായി ആണെന്നാണ് സൂചന. സംഭവത്തില് പ്രതിഷേധിച്ച് ആര്പിഐ സംസ്ഥാന വ്യാപകമായി ബന്ദിന് ആഹ്വാനം ചെയ്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
