ന്യൂഡല്‍ഹി: സിനിമാ തിയേറ്ററുകള്‍, ഷോപ്പിംഗ് കോംപ്ലക്‌സ്, ജിം, സ്വിമ്മിങ് പൂള്‍,ബാറുകള്‍ തുടങ്ങിയവ മാര്‍ച്ച് 3 വരെ അടഞ്ഞു കിടക്കും. കോവിഡ് വ്യാപനം തടയുന്നതിന് ലോക്ക്ഡൗണ്‍ നീട്ടിയ പശ്ചാത്തലത്തില്‍ കേന്ദ്ര ആഭ്യന്തരമന്ത്രാലയം പുറത്തിറക്കിയ ക്രോഡീകരിച്ച മാര്‍ഗരേഖയിലാണ് ഇക്കാര്യങ്ങള്‍ വ്യക്തമാക്കുന്നത്.
പ്രധാനമായി കാര്‍ഷിക മേഖലയ്ക്ക് ഇളവ് അനുവദിച്ച് കൊണ്ടു പുറത്തിറക്കിയ മാര്‍ഗരേഖയില്‍ എല്ലാ വിദ്യാഭ്യാസ സ്ഥാപനങ്ങളും ലോക്ക്ഡൗണ്‍ കാലയളവ് പൂര്‍ത്തിയാകുന്ന മെയ് മൂന്ന് വരെ അടഞ്ഞു കിടക്കണമെന്നും നിര്‍ദേശിക്കുന്നു. ഓട്ടോ, സൈക്കിള്‍ റിക്ഷ ഉള്‍പ്പെടെ എല്ലാ ടാക്‌സികളുടെയും ക്യാബുകളുടെയും സര്‍വീസും ഇക്കാലയളവില്‍ നിരോധിച്ചിട്ടുണ്ട്.
പൊതു ഇടങ്ങളില്‍ ആളുകള്‍ കൂട്ടം കൂടരുത്. അതിനാല്‍ ജനങ്ങള്‍ തടിച്ചൂകൂടാന്‍ സാധ്യതയുളള പൊതു ആരാധനാലയങ്ങള്‍ അടഞ്ഞുകിടക്കണം. ശവസംസ്‌കാരചടങ്ങുകളില്‍ 20 പേരില്‍ കൂടുതല്‍ ആളുകള്‍ പങ്കെടുക്കരുതെന്നും മാര്‍ഗരേഖയില്‍ പറയുന്നു. സാമൂഹിക അകലം കൃത്യമായി പാലിച്ചും മുഖാവരണം ധരിച്ചും തൊഴിലുറപ്പ് പ്രവര്‍ത്തനങ്ങള്‍ നടത്താം. ഇത് ഗ്രാമീണ മേഖലയ്ക്ക് ആശ്വാസമാകുമെന്നാണ് കരുതുന്നത്.
കര്‍ഷകരുടെ ഉത്പനങ്ങള്‍ വിറ്റഴിക്കാന്‍ കേന്ദ്രം ഇളവ് അനുവദിച്ചിട്ടുണ്ട്. ഇതനുസരിച്ച് കമ്പോളങ്ങള്‍ തുറക്കാം.പച്ചക്കറി കൃഷിക്കും ഇളവ് ബാധകമാണ്.കാര്‍ഷികവൃത്തിയുമായി ബന്ധപ്പെട്ടുളള ഉപകരണങ്ങള്‍ വില്‍ക്കുന്ന കടകള്‍ക്കും പ്രവര്‍ത്തിക്കാം. ഈ കടകളുടെ അനുബന്ധ സ്ഥാപനങ്ങളായി പ്രവര്‍ത്തിക്കുന്ന സ്‌പെയര്‍ പാര്‍ട്‌സ് കടകള്‍ക്കും തുറന്നുപ്രവര്‍ത്തിക്കാവുന്നതാണെന്നും മാര്‍ഗരേഖയില്‍ പറയുന്നു.
പണമിടപാടുകള്‍ തടസ്സമില്ലാതെ മുന്നോട്ടുപോകുന്നതിന് ബാങ്ക് ശാഖകള്‍ തുറന്നുപ്രവര്‍ത്തിക്കാം. എടിഎമ്മുകളുടെ പ്രവര്‍ത്തനത്തിനും തടസ്സമില്ല.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
