ഭക്ഷണത്തിൽ മണ്ണ് വാരിയിട്ടു; ഒന്നും മൂന്നും വയസുള്ള പെൺ കുഞ്ഞുങ്ങളെ കുത്തിക്കൊന്ന് അമ്മ ആത്മഹത്യക്ക് ശ്രമിച്ചു

ചണ്ഡീഗഢ്: രണ്ട് പെൺ കുഞ്ഞുങ്ങളെ കൊലപ്പെടുത്തി അമ്മ ആത്മഹത്യയ്ക്ക് ശ്രമിച്ചു. ഹരിയാനയിലാണ് ​ദാരുണ സംഭവം. ഹരിയാനയിലെ ഖേദർ ഗ്രാമത്തിലെ ചേരിയിൽ താമസിക്കുന്ന രാജസ്ഥാൻ സ്വദേശി അഹമ്മദിന്റെ ഭാര്യ ശാരിയ (27) ആണ് മക്കളെ കൊന്ന് ആത്മഹത്യയ്ക്ക് ശ്രമിച്ചത്. ഞായറാഴ്ച രാവിലെയാണ് സംഭവം. 

അഹമ്മദ്- ശാരിയ ദമ്പതിമാരുടെ മക്കളായ മമത (മൂന്ന് വയസ്) കിരൺ (ഒരു വയസ്) എന്നിവരാണ് കൊല്ലപ്പെട്ടത്. കറിക്കത്തി ഉപയോഗിച്ച് യുവതി രണ്ട് പേരെയും കുത്തിക്കൊല്ലുകയായിരുന്നുവെന്ന് പൊലീസ് പറഞ്ഞു. ഇതിന് ശേഷം കത്തി കൊണ്ട് സ്വയം മുറിവേൽപ്പിച്ച് ആത്മഹത്യയ്ക്ക് ശ്രമിക്കുകയും ചെയ്തു. എന്നാൽ കുടിലിൽ നിന്ന് ബഹളം കേട്ടെത്തിയ സമീപവാസികൾ ചോരയിൽ കുളിച്ചു കിടന്ന യുവതിയെ ആശുപത്രിയിൽ എത്തിച്ചു. ഇവരുടെ നില ഗുരുതരമായി തുടരുകയാണ്. 

ഗൃഹനാഥനായ അഹമ്മദ് ജോലിക്ക് പോയ സമയത്താണ് സംഭവം നടന്നത്. കുട്ടികൾ കളിക്കുന്നതിനിടെ ഭക്ഷണത്തിലേക്ക് മണ്ണ് എറിഞ്ഞിരുന്നു. ഇതിൽ കുപിതയായാണ് യുവതി മക്കളെ കൊലപ്പെടുത്തിയതെന്നാണ് ഭർത്താവും പൊലീസും പറയുന്നത്. സംഭവത്തിൽ യുവതിക്കെതിരേ കേസ് രജിസ്റ്റർ ചെയ്തിട്ടുണ്ട്.