എയർ ഇന്ത്യ എക്സ്പ്രസ് വിമാന സർവീസുകളുടെ സമയത്തിൽ മാറ്റം; റാസൽഖൈമ റൂട്ടിൽ അധിക സർവീസ് 

കൊച്ചി: യുഎഇ യാത്രാ വിലക്ക് ഏർപ്പെടുത്തിയതോടെ എയർ ഇന്ത്യ എക്സ്പ്രസ് വിമാന സർവീസുകൾ പുനഃക്രമീകരിച്ചു. അബുദാബിയിൽ നിന്നു ഏപ്രിൽ 25 ന് പുലർച്ചെ 2.30 ന് കോഴിക്കോട് വഴി തിരുവനന്തപുരത്തേക്കുള്ള എയർ ഇന്ത്യ എക്‌സ്പ്രസിന്റെ സമയം മാറ്റി. ഇന്ന്  രാത്രി 11.30 നായിരിക്കും സർവീസ് എന്ന് അധികൃതർ അറിയിച്ചു. യാത്രക്കാർ 8.30 ന് തന്നെ ടെർമിനൽ രണ്ടിൽ റിപ്പോർട്ട് ചെയ്യണമെന്നും എയർ ഇന്ത്യ അറിയിച്ചിട്ടുണ്ട്.

ഇന്ന് രാത്രി വൈകി പുറപ്പെടേണ്ടിയിരുന്ന തിരുവനന്തപുരം- കോഴിക്കോട് - അബുദാബി എയർ ഇന്ത്യ എക്സ്പ്രസ് വിമാനം നേരത്തെയാക്കി. തിരുവനന്തപുരത്ത് നിന്ന് വിമാനം ഇന്ന് വൈകീട്ട് 6.00 ന് പുറപ്പെടും. കോഴിക്കോട് -അബുദാബി വിമാനം വൈകീട്ട് 07.45 ന് പുറപ്പെടും.

യുഎഇയിൽ യാത്രാവിലക്ക് തുടങ്ങുന്നതിന് മുൻപ് അടിയന്തിരമായി എത്തിചേരേണ്ടവർക്കായി എയർ ഇന്ത്യ എക്സ്പ്രസ് ഇന്ന് കോഴിക്കോട് - റാസൽഖൈമ റൂട്ടിൽ അധിക വിമാന സർവീസ് നടത്തും. രാത്രി 8.15 നാണ് ഈ വിമാനം കോഴിക്കോട് നിന്ന് പുറപ്പെടുക. ടിക്കറ്റുകൾ എയർ ഇന്ത്യ ബുക്കിങ് ഓഫീസുകളിൽ നിന്നും വിമാനത്താവളങ്ങളിൽ നിന്നും വാങ്ങാം.