തിരുവനന്തപുരം: ആലപ്പുഴയിലെ ബിജെപി നേതാവ് രണ്‍ജിത് ശ്രീനിവാസന്റെ കൊലപാതകക്കേസ് അന്വേഷണം കേന്ദ്ര ഏജന്‍സിയെ ഏല്‍പ്പിക്കണമെന്ന് ബിജെപി. പൊലീസിനെക്കൊണ്ട് കേസ് തെളിയിക്കാനോ പ്രതികളെ പിടിക്കാനോ കഴിയില്ല. അതിനാല്‍ കേസ് ദേശീയ അന്വേഷണ ഏജന്‍സിക്ക് കൈമാറണമെന്ന് ബിജെപി സംസ്ഥാന പ്രസിഡന്റ് കെ സുരേന്ദ്രന്‍ ആവശ്യപ്പെട്ടു.
പൊലീസും സര്‍ക്കാരും പോപ്പുലര്‍ ഫ്രണ്ടിനെ സഹായിക്കുകയാണ്. പ്രതികള്‍ സംസ്ഥാനം വിട്ടത് ഗൗരവകരമാണ്. എഡിജിപി വിജയ് സാഖറെയുടെ പ്രസ്താവന പൊലീസിന്റെ നിസഹായത വെളിവാക്കുന്നു. ആഭ്യന്തര വകുപ്പിന്റെ പരാജയമാണ് എഡിജിപിയുടെ പ്രസ്താവന കാണിക്കുന്നത്.
പൊലീസിന്റേത് ലജ്ജാകരമായ കീഴടങ്ങലാണ്. പ്രതികളെ സഹായിക്കുന്ന നിലപാടാണ് പൊലീസിനും മുഖ്യമന്ത്രിക്കുമുള്ളത്. പ്രതികളെ പിടിക്കാന്‍ കഴിയുന്നില്ലെങ്കില്‍ അക്കാര്യം തുറന്നുപറഞ്ഞ് സംസ്ഥാന സര്‍ക്കാര്‍ ഈ നാടകം കളി അവസാനിപ്പിക്കണം.
കേസ് കൈമാറിയാല്‍ 24 മണിക്കൂറിനുള്ളില്‍ പ്രതികളെ പിടിക്കാന്‍ കേന്ദ്ര ഏജന്‍സികള്‍ക്ക് കഴിയും. രണ്‍ജിത് വധക്കേസ് അന്വേഷണം കേന്ദ്ര ഏജന്‍സികള്‍ക്ക് കൈമാറിയില്ലെങ്കില്‍ മുഖ്യമന്ത്രിയുടെ വീടിന് മുന്നില്‍ സമരം നടത്തുമെന്നും കെ സുരേന്ദ്രന്‍ പറഞ്ഞു.
ആലപ്പുഴയിലും പാലക്കാടും എസ്ഡിപിഐ നടത്തിയ കൊലപാതകത്തില്‍ അന്തര്‍ സംസ്ഥാന ഗൂഡാലോചനയുണ്ടെന്ന് ക്രമസമാധാന ചുമതലയുള്ള എഡിജിപി വിജയ് സാഖറെ വ്യക്തമാക്കിയിരുന്നു. കൊല നടത്തിയശേഷം അന്യ സംസ്ഥാനങ്ങളില്‍ വിദഗ്ധമായി ഒളിവില്‍ കഴിയുകയാണ് എസ്ഡിപിഐ രീതിയെന്നും സാഖറെ പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
