വി എ ശ്രീകുമാറിനെതിരെ കേസ്, മോഹൻലാൽ ഇന്ന് മാധ്യമങ്ങളെ കാണും: ഇന്നത്തെ അഞ്ച് പ്രധാന വാർത്തകൾ

മലയാള സിനിമയിൽ നിന്ന് ഉയരുന്ന ലൈം​ഗിക പരാതിയിൽ പൊലീസ് നടപടി തുടരുന്നു. ജൂനിയർ ആർട്ടിസ്റ്റിന്റെ പരാതിയിൽ സംവിധായകൻ വി എ ശ്രീകുമാറിനെതിരെ പൊലീസ് കേസെടുത്തു. ആരോപണ വിധേയനായ മുകേഷ് എംഎൽഎയുടെ രാജിയിൽ ഇന്ന് തീരുമാനമുണ്ടായേക്കും. സിപിഎം സംസ്ഥാന സമിതിയിൽ മുകേഷിന് എതിരായ പരാതി ചർച്ചയാകും. അതിനിടെ നടൻ മോഹൻലാൽ ഇന്ന് മാധ്യമങ്ങൾക്ക് മുന്നിലെത്തും. ഇന്നത്തെ അഞ്ച് പ്രധാന വാർത്തകൾ.

നടനും അമ്മ മുൻ പ്രസിഡന്റുമായ മോഹൻലാൽ ഇന്ന് മാധ്യമങ്ങളെ കാണും. തിരുവനന്തപുരത്തുവച്ച് ഇന്ന് ഇച്ചയ്ക്കാണ് താരം മാധ്യമങ്ങളെ കാണുക. ഹേമ കമ്മിറ്റി റിപ്പോർട്ട് പുറത്തുവന്നതിനു പിന്നാലെ മലയാള സിനിമയിലുണ്ടായ വിവാദങ്ങൾക്കിടെ ആദ്യമായാണ് മോഹൻലാൽ മാധ്യമങ്ങളുടെ മുന്നിലെത്തുന്നത്.

പീഡന പരാതിയിൽ സംവിധായകൻ വി എ ശ്രീകുമാറിന് എതിരെ കേസെടുത്തു. ജൂനിയർ ആർട്ടിസ്റ്റിന്റെ പരാതിയിൽ മരട് പൊലീസാണ് സംവിധായകനെതിരെ കേസെടുത്തത്. ഇ മെയിൽ വഴിയാണ് പൊലീസിൽ പരാതി ലഭിച്ചത്. കൊച്ചിയിലെ ഹോട്ടലിൽ വിളിച്ചുവരുത്തി ലൈം​ഗികമായി ഉപദ്രവിച്ചു എന്നാണ് പരാതി.

ബലാത്സംഗക്കേസിൽപ്പെട്ട എം മുകേഷ് എംഎൽഎയുടെ രാജി ആവശ്യം ശക്തമാകുന്നതിനിടെ സിപിഎം സംസ്ഥാന സമിതി ഇന്ന് യോഗം ചേരും. വിഷയം ഇന്ന് സമിതി ചർച്ച ചെയ്യും. മുകേഷിന് പറയാനുള്ളതും കൊല്ലത്ത് നിന്നുള്ള നേതാക്കളുടെ അഭിപ്രായവും കൂടി പരി​ഗണിച്ച ശേഷമായിരിക്കും സമിതി അന്തിമ തീരുമാനം എടുക്കുക.

സംസ്ഥാനത്ത് ഇന്നും പരക്കെ മഴ. പത്ത് ജില്ലകളിൽ ഇന്ന് യെല്ലോ അലർട്ട്. പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, മലപ്പുറം, കോഴിക്കോട്, വയനാട്, കണ്ണൂർ, കാസർക്കോട് ജില്ലകളിലാണ് യെല്ലോ.

സംവിധായകൻ ആഷിഖ് അബുവിന്റെ രാജിയിൽ പ്രതികരിച്ച് ഫെഫ്ക ഡയറക്‌ടേഴ്‌സ് യൂണിയൻ. ഫെഫ്കയിൽ അം​ഗത്വം പുതുക്കാൻ ഈ മാസം 12ന് പണം അടച്ചതിനു പിന്നാലെ ആഷിഖ് അബു രാജിവെച്ചത് വിചിത്രമാണ് എന്നാണ് ഔദ്യോ​ഗിക വാർത്താ കുറിപ്പിൽ പറയുന്നത്.